Valverde 3 aydan sonra qol vurmasından danışdı

“Real”ın üzvü Federiko Valverde Klublararası dünya çempionatının yarımfinalında “Əl-Əhli”ni 4:1 hesabı ilə məğlub etdikləri oyun haqda danışıb.

Futbolxeber.az saytının xarici KİV-ə istinadən verdiyi məlumata görə, uruqvaylı futbolçu noyabrın 2-dən sonra ilk dəfə “Real”ın heyətində fərqləndiyi üçün sevincini gizlətməyib:

“Fərqləndiyim üçün çox şadam. Hazırda özümü əla hiss edirəm. Düşünürəm ki, bu turnirdəki hər dəqiqəni qiymətləndirmək lazımdı. Həm öz oyunumdan, həm də komandamızın çıxışından razı qaldım. Bir müddət qol vura bilmədiyim üçün özümü yaxşı hiss etmirdim. Bu müddətdə mənə dəstək olan komanda yoldaşlarıma təşəkkür edirəm. Onlar hər zaman mənim yanımdadırlar. “Əl-Əhli” ilə matçda qol vurmaq və sevincimi komanda yoldaşlarımla bölüşmək çox gözəl idi. İndi yaxşı istirahət etməli və finalda qələbə qazanmaq üçün əlimizdən gələni etməliyik”.

Qeyd edək ki, “Real” fevralın 11-də Klublararası dünya çempionatının finalında Səudiyyə Ərəbistanının “Əl-Hilal” klubu ilə qarşılaşacaq.