Ançeloti: “Çox məyusedici məğlubiyyət aldıq”

“Real”ın baş məşqçisi Karlo Ançelotti La Liqanın 20-ci turunda “Malyorka”dan alınan 0:1 hesablı məğlubiyyəti şərh edib.

Futbolxeber.az saytının xarici KİV-ə istinadən verdiyi məlumata görə, italiyalı mütəxəssis qarşılaşmanın komandası üçün çox ağır və çətin keçdiyini bildirib:

“Çox məyusedici məğlubiyyət aldıq. Bu yenilgi La Liqadakı vəziyyətə təsir göstərəcək. Oyun biz gözlədiyimiz kimi keçdi: ağır, çətin və böyük pauzalarla. İlk hissədə kiçik faktorlar həlledici rol oynadı. Qapımızda gördüyümüz qol bizə pis təsir göstərdi. Hesabda geri düşdükdən sonra soyuq başla oynamağımız alınmadı”.

Bugünkü yenilgiyə baxmayaraq, Ançelotti La Liqada sona kimi çempionluq uğrunda mübarizə apacaqlarını vurğulayıb: “Hazırda ikinci pillədəyik. Lakin sona kimi qızıl medalla uğrunda yarışacağıq. Mövsümün sonuna kimi hələ çox oyun var. Bu gün biz uduzduğumuz kimi, “Barselona” da məğlubiyyə acısı yaşaya bilər”.

Qeyd edək ki, 45 xalla ikinci pillədə qərarlaşan “Real” lider “Barselona”dan 5 xal geri qalır. Lakin Kataloniya klubu bu tur “Sevilya” ilə görüşdə ən yaxın izləyicisi ilə xal fərqini daha da artıra bilər.