Qvardiola: “İndi çempionluq barədə düşünəcək vəziyyətdə deyilik”

“Mançester Siti”nin baş məşqçisi Xosep Qvardiola İngiltərə Premyer Liqasının 22-ci turunda “Tottenhem”ə uduzduqları (0:1) oyun barədə danışıb.

Futbolxeber.az saytının məlumatına görə, ispan mütəxəssis məğlubiyyətə səbəb tapmaqda çətinlik çəkdiyini bildirib: “Biz oyuna əla başladıq. Lakin səhvimizə görə cəzalandırıldıq. 0:1-dən sonra artıq başqa oyun gedirdi. Düzdür, qol vurmaq üçün şanslarımız oldu. Lakin keçid fazalarında topu itirdikdən sonra Son və Kulusevskiyə qarşı oynamaq çətindir. Bu gün vacib 3 xal itirdik. Oyunçular verdiyim tapşırıqları yerinə yetirmək üçün çalışırdılar. Lakin 10 nəfərlə müdafiə olunan rəqibə qarşı oynamaq çətindir. Pis oynamadıq. Uğur üçün son ötürmələr və qol çatışmırdı. Bu məğlubiyyətə səbəb göstərmək çətindir”.

Pep hazırda çempionluq barədə düşünmədiklərini bildirib: “İndi çempionluq barədə düşünəcək vəziyyətdə deyilik. İndi yalnız növbəti turda “Aston Villa”ya qarşı keçirəcəyimiz matç haqda düşünməliyik və həmin görüşə mümkün olduğu qədər yaxşı hazırlaşmalıyıq”.

Qeyd edək ki, bu məğlubiyyətdən sonra “Mançester Siti” lider “Arsenal”dan 5 xal geri qalır. Lakin London klubu rəqibi ilə müqayisədə 1 oyun az keçirib.