Mahir Emreli “Çelsi” haqda: “Bizim üçün çətin oyun oldu”

“Bizim üçün çətin oyun oldu, amma biz matçın ilk 15 dəqiqəsinə yaxşı başladıq. Lakin rəqibimiz böyük komandadır və bunu başa düşürük. Bəzi məqamlarda konsentrasiyanı itirdik və nəticədə qol buraxdıq”.

Futbolxeber.az saytının məlumatına görə, bu sözləri Zaqreb "Dinamo"sunun futbolçusu Mahir Emreli Çempionlar Liqasının qrup mərhələsinin sonuncu turunda səfərdə "Çelsi"yə 1:2 hesabı ilə uduzduqları oyundan sonra deyib.

“Oyunda bizim də, rəqibində üstünlük təşkil etdiyi məqamlar oldu. "Çelsi" 2-ci hissəyə yaxşı başladı. İkinci qolu vurmaq və buradan ən azı bir xal götürmək üçün bir neçə şansımız oldu. Sonda "Çelsi" qalib gəldi və bu münasibətlə onları təbrik edirəm", - deyə o bildirib.

Bu mövsüm ÇL-in qrupunda ilk oyununa çıxan millimizin üzvü komandanın daha uğurlu çıxış etməsi üçün nəyin çatışmadığı barədə bunları söyləyib: “Qrup oyunlarında nəyin çatışmadığını söyləmək çətindir. Səhvlərimizi təhlil etməliyik. Amma bu artıq keçmişdə qalıb. Biz bunu təcrübə kimi qəbul edib növbəti oyunları düşünməliyik".

M. Emreli "Stemford Bric"də komandanı dəstəkləyən Zaqreb klubunun azarkeşlərinə təşəkkür edib: “Bundan əvvəl bir çox komandaya qarşı oynamışam, daha iki klubla avrokuboklarda çıxış etmişəm. Amma “Dinamo” azarkeşləri inanılmazdırlar. Qələbə və ya məğlubiyyətdən asılı olmayaraq, onlar həmişə stadiondadırlar. Biz həmişə onların dəstəyini hiss edirik. Azarkeşlərə təşəkkür etmək üçün oyundan sonra daha on dəqiqə də onların yanında qaldıq. Çünki bu, azarkeşlər üçün asan yol deyildi. Mən onlara təşəkkür etmək istərdim. Biz burada onlarla birlikdə idik”.

Qeyd edək ki, "Dinamo" E qrupunda sonuncu olub.

Xatırladaq ki, M.Emreli "Çelsi" ilə görüşün 70-ci dəqiqəsində meydana çıxıb.