“Rostov”un 6 futbolçusu koronavirusa yoluxdu: ortaya çıxan problemlər və nə etməli?

Cümə günü Rusiya Premyer Liqasının oyunları start götürülməli olsa da, artıq ortaya müəyyən problemlər çıxıb.

Futbolxeber.az saytının Rusiya mətbuatına istinadən verdiyi məlumata görə, bu gün məlum olub ki, “Rostov”un 6 futbolçusu koronavirusa yoluxub: Roman Yeremenko, Dennis Xadjikaduniç, Xoren Bayramyan, Matias Normann, İvelin Popov və Arseniy Loqaşov.

42 NƏFƏR KARANTİNƏ ALINIR

Çempionatın bərpası öncəsi adıçəkilən futbolçulardan götürülən analizlərin cavabı müsbət olub. Artıq “Rostov” rəsmi olaraq 6 oyunçunun virusa yoluxduğunu bəyan edib. Lakin adlar açıqlanmır. Yuxarıdakı siyahı mətbuatın iddiasıdır.

Problem təkcə bu 6 futbolçu ilə yekunlaşmır. Rusiya Premyer Liqasının tibbi protokolunda qeyd olunur: “COVİD-19-a yoluxan xəstələrlə ünsiyyətdə olan şəxslər 14 günlük karantinə alınmalıdırlar”. Bu isə o deməkdir ki, “Rostov”un bütün məşqçi və futbolçu heyəti 2 həftə ərzində karantində olmalıdır. Klubdan o da bildirilib ki, virusa yoluxanların hər biri əsas heyət üzvü olduğundan ümumilikdə bütün komanda ilə təmasda olublar. “Rostov”un prezidenti Artaşes Arutyunyants da məhz 42 nəfərin 2 həftəlik karantində olacağını təsdiqləyib.

YETƏRSAY OLMASA, TEXNİKİ MƏĞLUBİYYƏT VERİLƏCƏK

Rusiya Premyer Liqasının tibbi protokolunda virus, oyunçuların testdən keçirilməsi haqda məlumatlar olsa da, indiki şəraitdə hansı addım atılmalı olduğu barədə heç bir qeyd yoxdur.

Rusiya Futbol İttifaqının inkişaf üzrə direktoru Maksim Mitrofonov hazırkı durum haqda deyib:  “16 meydan oyunçusu və 2 qapıçı heyətdə olsa, komandanın meydana çıxmasına icazə veriləcək. Yox, əgər yetərsay olmasa, o zaman kollektivə texniki məğlubiyyət veriləcək. Hansısa klubu çempionatdan uzaqlaşdırmaq fikrində deyilik”.

Rusiya Premyer Liqasının prezidenti Sergey Pryadkin də müsahibəsində buna bənzər fikirlər səsləndirib. Bu isə o deməkdir ki, sözügedən məsələ ilə bağlı Rusiya Futbol İttifaqı ilə Rusiya Premyer Liqası eyni mövqedədir.

Hazırda “Rostov”un əsas heyətində virusa yoluxan futbolçularla ünsiyyətdə olmayan kimsə yoxdur. Bu halda komandanın 2 gün sonrakı oyunu necə olacaq? Amma bu vəziyyətdən də çıxış yolu var - gənclər komandası, hansı ki adətən əsas heyətdən ayrı məşq edir. Hazırkı məqamda çempionatın təşkilatçıları əvəzedicilərin meydana çıxması üçün heç bir qadağa tətbiq etmir.

2 VARİANT MÖVCUDDUR

Hazırda oyunun təxirə salınması, başqa vaxta keçirilməsi haqda müzakirələr aparılsa da, sabah rəsmi qərarın veriləcəyi gözlənilir.

Mitrofanovun sözlərini əsas götürüb, reqlamentə diqqət yetirilsə, o zaman 2 variant var:

1. “Rostov” cümə günü meydana o futbolçular çıxacaq ki, hansılar virusa yoluxmuş 6 nəfərlə kontaktda olmayıblar. Yəni gənclər komandası. Lakin bu halda ortaya başqa problem çıxır. Çempionata hazırlıq çərçivəsində “Rostov”un əsas heyəti gənclər komandası ilə yoxlama oyunu keçirib. Bu isə o deməkdir ki, həmin gün əsas komandayla ünsiyyətdə olmuş gənclər də risk zonasındadırlar.

2. “Rostov” 16 oyunçu sifariş edə bilməsə, “Soçi” ilə oyuna görə texniki məğlubiyyət alacaq. Özü də komanda təkcə “Soçi” ilə oyunda xalsız qalmayacaq. 10 gün sonra keçirilməli olan “Arsenal” (Tula) və 2 həftə sonra oynanılmalı olan “Krasnodar”la görüşlərə görə də “Rostov”a texniki məğlubiyyət veriləcək...

BƏLKƏ “ROSTOV”UN OYUNLARI TƏXİRƏ SALINSIN?

“Rostov”un prezideni Artaşes Arutyunyants bildirir ki, komandası 5-ci gün meydana çıxmaqda həvəsli deyil:

“Rostov” çempionatın bərpasının tərəfdarı idi. İndi də həmin mövqedə qalırıq. Buna kimi Rusiya Futbol İttifaqını dəstəkləyir və çempionatın restartını dəstəkləyirdik. Komandamız Soçidə qarşıdakı oyuna hazırlaşırdı. Qayıdışın uğurlu olmasına çalışırdıq. Lakin həyat gözlənilməzliklərlə doludur. 6 futbolçumuz virusa yoluxub və bu, fors-majordu. Hazırda Rusiya Futbol İttifaqının və Premyer Liqanın rəhbərliyi ilə sıx əlaqədəyik. Amma istənilən halda hazırkı məqamda qaydalara tam riayət edərək, 2 həftəlik karantinə çəkilirik. 14 gündən sonra komanda meydana qayıdacaq”.

Klub prezidentinin də dediyi kimi, bu, fors-major vəziyyətdi. Belədə ortaya üçüncü ehtimal da çıxır: oyunların təxirə salınması.  

Məsələn, “Rostov”un “Soçi” ilə oyunu 17-18 iyul tarixlərinə keçirilə bilər. Həmin vaxt Rusiya kubokunda yarımfinal görüşləri keçiriləcək ki, həm “Rostov”, həm də “Soçi” artıq bu turnirdə mübarizə aparmır. Ona görə də bu ehtimal real görünür. İddiaya görə, “Rostov” rəhbərliyi də indiki məqamda oyunlarının təxirə düşməsi üçün çalışır.

FUTBOLXEBER.AZ