Blatter: “Futboldan Rusiyaya görə uzaqlaşdırılmamışam”

FİFA-nın keçmiş prezidenti Yozef Blatter DÇ-2018 və DÇ-2022-nin ev sahibliyi ilə bağlı uzun illərdi davam edən rüşvət qalmaqalı haqda danışıb.

Futbolxeber.az saytının məlumatına görə, o, ABŞ tərəfinin ittihamlarına təəccüblənmədiyini bildirib:

“Bütün bu məsələlərlə bağlı məhkəmədə ifadə vermişəm. İndi yenidən Rusiyanın dünya çempionatına ev sahibliyi etməsi məsələsinə qayıtmaq mənasızdı. 2 il əvvəl başa çatmış turnirlə bağlı danışmaq mənasızdı. Onu da deyim ki, amerikalılar Qətərdən daha çox, məhz Rusiyanın mundiala ev sahibliyi etməsi ilə razılaşmırdılar. 2014-2015-ci illərdən artıq fəal hücuma keçdilər. İlk dəfə FİFA-nın İsveçrədəki Konqresində buna ciddi şəkildə etiraz etdilər. Artıq ABŞ-la bağlı heç nə məni təəccübləndirmir”.

FİFA-nın keçmiş rəhbəri Rusiya Futbol İttifaqının sabiq başçısı rəhbəri Vyaçeslav Koloskovun “Blatter Rusiyaya görə futboldan uzaqlaşdırılıb” fikrinə də münasibət bildirib:

“Dostum Vyaçeslava demək istərdim ki, bu, belə deyil. Mən futboldan Rusiyaya görə uzaqlaşdırılmamışam. Biz FİFA prezidenti olmağı hədəfləyən Platinini dayandırmağa çalışırdıq. Halbuki mən 2019-cu ilə kimi quruma rəhbərlik etməliydim. Odur ki, Rusiyanın mənim futboldan uzaqlaşdırılmağıma aiddiyyatı yoxdu”.