İngiltərənin 4 klubu Premyer Liqanın yarımçıq dayandırılmasını istəyir

İngiltərədə Premyer Liqanın cari mövsümün başa çatdırılması ilə bağlı müzakirələr davam edir.

Futbolxeber.az saytının “The Independent”ə istinadən verdiyi məlumatra görə, mövsümün başa çatdırılmaması klublara maddi baxımdan sərf etmir. Belə ki, cari çempionat başa çatdırılmasa, Premyer Liqa klubları təkcə teleyayımdan 1,2 milyard funt ziyana uğrayacaqlar. Məhz bu səbəbdən əksər klublar azarkeşsiz belə olsa, qalan oyunların keçirilməsini istəyirlər. Üstəlik, bu halda televiziyada qarşılaşmaları izləyənlərin sayı daha da artacaq.

Britaniya mətbuatının bir başqa iddiasına görə, yalnız 4 klub mövsümün bu şəraitdə davam etdirilməsinə qarşıdırlar. Həmin klubların adları açıqlanmasa da, onların turnir cədvəlində son pillələrdə qərarlaşan kollektivlər olduğu vurğulanır.

Anonim mənbə qeyd edir ki, mövsümün yarımçıq dayandırılması ən pis variantdır: “Amma bu, baş verərsə, klubların heç biri “Liverpoul”un çempion elan edilməsinə etiraz etməyəcək, lakin turnir cədvəlinin sonu ilə bağlı xaos yaranacaq”.  

Xatırladaq ki, bir neçə gün əvvəl “Vest Hem” rəsmisi Karren Breydi cari mövsümün nəticələrinin tanınmamalı olduğunu bəyan etmişdi.