Ronaldo: "Mançester Yunayted" heç nə etmədi"

"Çempionlar Liqası xüsusi turnirdi. Burada hesabda öndə olsan belə arxayınlaşmaq olmaz. Çünki hər şey ola bilər. Oyun ərzində üstün tərəf biz idik və çox qol epizodu yaratdıq. Üç və ya dörd epizodda fərqlənə bilərdik. Amma son dəqiqələrə arxayınlaşdıq və cəzalandırıldıq".

 

Futbolxeber.az saytının məlumatına görə, bu sözləri "Yuventus"un futbolçusu Kriştiano Ronaldo Çempionlar Liqasının qrup mərhələsinin 4-cü turunda "Mançester Yunayted"ə 1:2 hesabı ilə  uduzduqları oyunu şərh edərkən deyib.

 

Portuqaliyalı fikirlərinə bu cür davam edib: "Mançester Yunayted" qələbə üçün heç nə etmədi. Onların uğur qazandığını demək düzgün deyil,çünki oyunu rəqibə hədiyyə etdik. Buna baxmayaraq, başımızı aşağı salmamalıyıq. Biz yaxşı oynadıq və yenə də qrup lideriyik. Paltardəyişmə otağında vurduğum qola təkrar baxdım. Möhtəşəm bir qol olduğunu söyləyə bilmərəm, amma yaxşı zərbə vurmuşam. Qol vurmağımdan məmnunam, amma qələbə qazana bilmədiyimiz üçün təəssüflənirəm. Əla komandamız var, amma finala hələ çox var. Burda insanlar kuboku qazanmağı arzulayır. Biz addımbaaddım hərəkət etməliyik".