Neymarın PSJ-də məşqlərə başlayacağı tarix müəyyənləşib

Braziliya millisinin futbolçusu Neymarın Fransanın PSJ klubunun düşərgəsinə qayıdacağı tarix müəyyənləşib.

 

Futbolxeber.az-ın  UOL portalına istinadən xəbər verir ki, ağır zədədən sonra müalicəsini davam etdirən 26 yaşlı hücumçu aprelin sonunda komandaya qoşulacaq. Hazırda PSJ-nin həkiminin nəzarəti altında bərpa prosesi keçən Neymarın Fransa çempionatının son 3 oyununda – “Amyen”, “Renn” və “Kan”la görüşlərdə Paris təmsilçisinə kömək edə biləcəyi proqnozlaşdırılır. PSJ Fransa Kubokunun finalına çıxacağı təqdirdə, onun bu görüşdə də iştirak etmək ehtimalı var.

 

Daha əvvəl Braziliya yığmasının həkimi Rodriqo Lasmar forvardın, təqribən, 3 ay yaşıl meydanlardan kənar qalacağını bildirmişdi.

 

Qeyd edək ki, Neymar fevralın 25-də PSJ-nin Fransa çempionatının XXVII turunda evdə “Marsel”i 3:0 hesabı ilə məğlub etdiyi oyunda zədələnib. Ona baldırla pəncəni birləşdirən bağların dartılması və pəncə sümüyündə çat diaqnozu qoyulub. Neymar cari mövsümdə PSJ-nin heyətində 30 oyunda iştirak edib və 29 qol vurmaqla yanaşı, 19 məhsuldar ötürmə verib.