Sabiq “Bakı”lı Portuqaliya klubunun qələbəsində pay sahibi oldu

Portuqaliya çempionatının 2-ci divizionunda növbəti turun oyunları keçirilib.

Futbolxeber.az saytının məlumatına görə, “Bakı”nın yetirməsi Valeh Seyidovun şərəfini qoruduğu “Louletano” “Lusitano”nu qəbul edib. Matç həmyerlimizin komandasının 2:1 hesablı qələbəsi ilə başa çatıb.

Bu qələbədə Valehin də mühüm rolu olub. 63-cü dəqiqədə, hesab 1:1 olarkən braziliyalı komanda yoldaşının əvəzinə meydana daxil olan Seyidov komandasının qələbəsinə töhfə verib. Məhz onun hücumdakı fəallığından sonra komandası qələbə topunu vurub - 2:1. Oyunsonrası mətbuat konfransında “Louletano”nun baş məşqçisi bu amili xüsusi vurğulayıb.

Hazırda 16 komanda arasında 38 xalla 7-ci olan Seyidovun komandası turnir cədvəlindəki vəziyyətini yaxşılaşdırıb.

Maraqlıdı ki, 21 yaşlı hücumçu meydana çıxdığı bütün oyunlarda komandasına fayda versə də, nədənsə milli komandalarınn məşqçiləri ona diqqət yetirmir. Yığmalarımız məğlubiyyətləri sıraladığı, qola həsrət qaldığı bir zamanda məşqçilər Seyidovu hətta sınamağı belə, lazım bilmirlər.