Çexiya millisinin baş məşqçisi: "Reytinq uğrunda mübarizə aparacağıq

DÇ-2018-in seçmə mərhələsi çərçivəsində Azərbaycan millisinin qonağı olacaq Çexiya yığmasının baş məşqçisi Karel Yarolim oyunla bağlı fikirlərini bildirib.

 

Futbolxeber.az xəbər verir ki, mütəxəssis öz ölkəsinin mətbuatına açıqlamasında heyətdəki oyunçuların hazırlığının onu qane etdiyini deyib:

 

“Hazırda heyətdə yer alan futbolçuların vəziyyəti məni qane edir. Azərbaycanla oyundan öncə komandamın motivasiyası yüksəkdi. Futbolçularım qarşıdakı görüşlərə yaxşı kökləniblər. Azərbaycanın da bizim kimi dünya çempionatının final mərhələsinə çıxmaq şansları qalmayıb. Buna baxmayaraq, sona qədər mübarizə aparmalıyıq. Çünki qeydə alınacaq nəticə turnir cədvəlindəki mövqeyimizə və reytinqimizə təsir edəcək. Avropa çempionatının seçmə mərhələsində hansı səbətdə yer alacağımızı məhz reytinq əmsalımız müəyyənləşdirəcək”.

 

Qeyd edək ki, Azərbaycan - Çexiya matçı oktyabrın 5-də, saat 20:00-da başlayacaq.