Pol Poqba: “Dünyanın ən yaxşı futbolçusu olmaq istəyirəm”

“Yuventus”un və Fransa millisinin üzvü Pol Poqba gələcək planları haqda danışıb. Futbolxeber.az-ın məlumatına görə, fransız yarımmüdafiəçi hədəflərinin böyük olduğunu gizlətməyib: “Futbolda stabillik böyük rol oynayır. Çoxları sürətlə zirvəyə doğru irəliləyə bilərlər. Amma eyni sürətlə uçuruma düşmək də mümkündür. İrəli qaçmaq istəmirəm. Lakin gizlətmirəm, iddialarım böyükdür. Məqsədim bacardıqca çox kubok qazanmaqdır. Kuboklarla yanaşı, dünyanın ən yaxşı futbolçusu olmaq da istəyirəm. Kriştianu Ronaldo və Lionel Messi bəzən vurduqları qoldan sonra da özlərindən razı qalmırlar. Bu isə müsbət məqamdır. Deməli, özlərindən daha çox şey gözləyirlər. Hər şey insanın futbola necə yanaşması və ambisiyasından asılıdır”.