Azərbaycan millisinin yer aldığı qrup Konteyə 1 milyon avro qazandıra bilər

İtaliya millisi ilə 2 illik müqavilə imzalayan Antonio Kontenin təqdimat mərasimi avqustun 19-u Romada keçiriləcək. Futbolxeber.az-ın məlumatına görə, sabiq “Yuventus”lunun yeni iş yerindəki əmək haqqısı 4 milyon avro olacaq. Bu pulun yarısını İtalya Futbol Federasiyası, digər yarısını isə federasiyanın əsas sponsoru olan “Puma” şirkəti ödəyəcək.  

Bununla da Konte milli komanda baş məşqçiləri arasında ən yüksəködənişli ikinci mütəxəssis olacaq. Konte yalnız Rusiya millisini çalışdıran həmyerlisi Fabio Kapellodan geri qalacaq. Çünki Kapellonun Rusiya millisindəki illik qazancı 6,7 milyon avrodu.   

İtaliya millisi AVRO-2016-nın final mərhələsinə yüksəlsə, Konte daha 1 milyon avro əldə edəcək. Seçmə mərhələdə İtaliya millisi Xorvatiya, Bolqarıstan, Norveç, Azərbaycan və Maltayla bir qrupda yer alıb.  

İtaliya millisi FİFA reytinqində 5 pillə irəliləsə, Konte daha 500 min avro irəli düşəcək. Nəhayət, Konte İtaliya millisini növbəti qitə birinciliyinin finalına yüksəltsə, büdcəsini daha 500 min avro ilə zənginləşdirəcək.