Azərbaycan gimnastları Portuqaliyada Dünya Kubokunda uğurlu çıxış ediblər

Portuqaliyanın Koimbra şəhərində keçirilən batut gimnastikası və tamblinq üzrə Dünya Kubokunun final həyəcanı başa çatıb.

Futbolxeber.az saytının Azərbaycan Gimnastika Federasiyasına istinadən verdiyi məlumata görə, finalda batut gimnastikası üzrə təmsilçimiz Maqsud Mahsudov 61.440 xal toplayaraq yarışı 7-ci pillədə tamamlayıb.

Kişilərin sinxron proqramında isə Maqsud Mahsudov və Hüseyn Abbasov bürünc medalın sahibi olublar.

Tamblinq üzrə mübarizədə Mixail Malkin 32.300 xalla bütün rəqiblərini geridə qoyaraq qızıl medala sahib çıxıb. Tofiq Əliyev 29.300 xalla bürünc medal qazanıb.

Eyni gündə keçirilən Coimbra GymFest beynəlxalq turnirində də Azərbaycan gimnastları uğurlu çıxışla yadda qalıblar.

Batut gimnastikası üzrə fərdi proqramda Maqsud Mahsudov qızıl, Hüseyn Abbasov isə gümüş medal qazanıb.

Tamblinq üzrə komanda yarışlarında Aleksey Karataşov, Bilal Qurbanov və Hüseyn Əsədullayev qızıl medal əldə ediblər.

Fərdi proqramda Bilal Qurbanov qızıl, Aleksey Karataşov isə bürünc medala yiyələniblər. Bundan əlavə, Sənan Rzazadə qızıl, Əsnad Niftiyeva və Xədicə Məmmədzadə də gümüş medalla turniri başa vurublar.