Dağıstanlı döyüşçü: “Bakıdakı UFC turnirində azarkeşləri əsl şou gözləyir”

“Bakıda parlaq qələbə qazanmağıma heç nə mane ola bilməz”.

Futbolxeber.az saytının məlumatına görə, bu sözləri Azərbaycanda keçiriləcək UFC turnirinin ikinci əsas döyüşündə braziliyalı Miçel Pereyra ilə qarşılaşacaq Şarabutdin Maqomedov deyib.

“Pirat” ləqəbi ilə tanınan dağıstanlı döyüşçü iyunun 27-də Milli Gimnastika Arenasında baş tutacaq qarşılaşmaya tam hazır olduğunu bildirib və azarkeşləri turnirə dəvət edib: “Döyüşə hazıram və iyunun 27-nə qədər tam ideal formada olacağam. Azərbaycanda parlaq qələbə qazanmağıma heç nə mane ola bilməz. Azərbaycan tamaşaçısı mənim üçün doğmadır. Ümumiyyətlə, bütün Qafqazda insanlar mənə azarkeşlik edəcəklər. Mən Xəzər dənizinin piratıyam və məni dəstəkləyən hər kəsi arenaya dəvət edirəm. Qələbəni birlikdə qazanacağıq”.

İdmançı Bakıda döyüşmək arzusunun əvvəlki illərdən yarandığını da vurğulayıb: “Keçən il UFC turnirinin Bakıda keçiriləcəyi məlum olanda dərhal menecerimlə danışdım və burada döyüşmək istədiyimi bildirdim. Bakı mənə çox yaxındır, ona görə də burada çıxış etmək mənim üçün xüsusi məna daşıyır. Şadam ki, bu dəfə bu imkan reallaşdı”.

Maqomedov turnirin yüksək səviyyədə təşkil olunacağına inandığını bildirib və azarkeşləri möhtəşəm döyüş gecəsinin gözlədiyini qeyd edib: “Əminəm ki, bu turnir daha yüksək səviyyədə keçəcək. Azərbaycanda artıq bu sahədə böyük təcrübə var. Bakıda döyüşəcək idmançıların əksəriyyəti ayaqüstü döyüşə üstünlük verir. Xüsusilə əsas döyüşdə Rafael Fiziyev çıxış edəcək. Azarkeşləri əsl şou gözləyir”.

O, həmçinin döyüş strategiyasına toxunaraq emosiyalara qapılmamağın vacibliyini vurğulayıb: “Azarkeşlərin böyük dəstəyini hiss edəcəyəm. Ona görə də soyuqqanlı olmalı, ehtiyatsız hücumlardan qaçmalı və ağıllı döyüşməliyəm. Eyni zamanda tamaşaçılara da şou göstərmək istəyirəm. Mən hər zaman döyüşü erkən bitirməyə çalışıram. Bu dəfə də məqsədim dəyişmir. İstəyirəm ki, qalib elan olunanda rəqibim ayaq üstə qala bilməsin”.

Azərbaycan döyüşçüləri ilə əlaqələrindən də danışan Maqomedovun sözlərinə görə, onlarla uzun illərdir dostluq əlaqələri mövcuddur: “Mən azərbaycanlı döyüşçülərlə birlikdə məşq etmişəm, Taylandda da tez-tez birgə təlimlər keçmişik. Azərbaycanlı idmançı Əlövsət Məmiyev yaxın dostumdur. İdman bizi birləşdirir və bu əlaqələr mənim üçün çox dəyərlidir”.