Olimpiya çempionumuzun qazancı “bürünc” oldu

Macarıstanın paytaxtı Budapeştdə keçirilən dünya çempionatı davam edir.

Futbolxeber.az saytının məlumatına görə, bu gün Azərbaycanın daha bir cüdoçusu mübarizəyə qoşulub.

Olimpiya, dünya və Avropa çempionu Zelim Kotsoyev (100 kq) 1/16 finalda Cennaro Pirelliyə (İtaliya) ilə qalib gəlib.

İdmançımız 1/8 final mərhələsində Marat Baykamurovu (Qazaxıstan) məğlub edərək 1/4 finala yüksəlib. Bu mərhələdə o, Arman Adamyana (IJF) uduzub.

Daha sonra təsəlliverici görüşdə ispaniyalı Nikoloz Şerazadişvilini üstələyən Kotsoyev, bürünc medal uğrunda döyüşdə Cənubi Koreyadan olan Kim Se Xen üzərində qələbə qazanaraq yarışın mükafatçısı olub.

Xatırladaq ki, daha bir Olimpiya çempionumuz Hidayət Heydərov (73 kq) bu turnirdə gözlənilməz məğlubiyyətlə üzləşib. O, 1/16 finalda Otari Kvantidze (Portuqaliya) ilə qarşılaşıb və uduzaraq mübarizəni erkən başa vurub.

Qeyd edək ki, Azərbaycanı mundialda 10 çəki dərəcəsində 13 cüdoçu (9 kişi, 4 qadın) fərdi yarışlarda təmsil edir. Millimiz həmçinin qarışıq komanda yarışında mübarizə aparacaq. Cüdoçularımızdan Zelim Tçkayev (81 kq) və Elcan Hacıyev (90 kq) bürünc medal qazanıb.