İdmançılarımız “Ədalətli oyun və sülh naminə Avropanı keçək” estafetinə qoşulublar

Azərbaycan idmançıları “Ədalətli oyun və sülh naminə Avropanı keçək” estafetinə qoşulublar.

Futbolxeber.az saytının məlumatına görə, bu barədə Milli Olimpiya Komitəsinin (MOK) mətbuat xidməti açıqlama yayıb.

Avropa Ədalətli Oyunlar Hərəkatının (EFPM) 30 illik yubileyi münasibətilə həyata keçirilən “Ədalətli oyun və sülh naminə Avropanı keçək” təşəbbüsü çərçivəsində azərbaycanlı idmançılar Bakıdan Brüsselə qədər olan 3659 km-lik rəmzi məsafəni uğurla tamamlayıblar.

Qeyd olunan məsafə ölkə üzrə müxtəlif idman növlərini (atletika - 2150 km, velosiped 1000 km, alpinizm - 210 km, taekvondo - 174 km, güləş - 85 km, üzgüçülük - 40 km) təmsil edən 62 idmançı tərəfindən kollektiv şəkildə qət olunub.

Təşəbbüs MOK-un Ədalətli Oyunlar Komissiyası və Atletlər Komissiyasının birgə təşkilatçılığı ilə həyata keçirilib. İdmançılarımızın Avropa estafetinə cəlb olunmalarında əsas məqsəd ədalətli oyun, sülh və qarşılıqlı hörmət kimi dəyərləri təbliğ etmək olub.

Layihə təkcə idman bacarıqlarını deyil, həm də komandada işləmək, həmrəylik və idman ruhunu nümayiş etdirib.

Qeyd edək ki, layihə mayın 19-da Yunanıstanın Olimpiya şəhərində keçiriləcək Dünya Ədalətli Oyunlar Günü ilə yekunlaşacaq.