Federesiya prezidenti: “Azərbaycan ABŞ-Rusiya görüşünü qəbul etməyə hazırdır”

Rusiya İdman Güləşi Federasiyasının (FSGR) prezidenti Mixail Mamiyaşvili Rusiya və ABŞ yığmaları arasında sərbəst güləş üzrə keçiriləcək yoldaşlıq görüşü barədə danışıb.

Futbolxeber.az saytının məlumatına görə, bu haqda o, TASS agentliyinə müsahibəsində fikirlərini bölüşüb.

Qurumun rəhbəri deyib ki, əgər bu görüş baş tutsa, bu, çox rəmzi bir hadisə olacaq: "Biz görüşün Özbəkistanda keçirilməsinə daha çox meylliyik. Bunun səbəbləri var. Heç bir pərdəarxası məsələ yoxdur, sırf texniki üstünlüklərdir. Amma Qazaxıstan və Azərbaycan da bu tədbiri keçirmək üçün münasib ölkələrdir. Çünki bu ölkələr də güləş milli idman növüdür, burada böyük ənənələr və dostluq münasibətləri var. Aramızda heç bir şərt yoxdur. Onlar da bu görüşü qəbul etməyə hazırdırlar.

İyulun sonu, daxili seçimlər nəzərə alınmaqla, hamı üçün uyğun vaxtdır. Yoldaşlıq görüşləri həmişə boksda və güləşdə parlaq tədbirlər olub. Belə komanda görüşləri hələ Sovet İttifaqı dövründən başlayaraq həmişə böyük maraq doğurub. Bu görüşdə zəif heyətlər olmayacaq. Üstəlik, ciddi mükafat fondu da nəzərdə tutulur”.

Qeyd edək ki, daha əvvəl Rusiya idman naziri Mixail Deqtyaryov yaxın vaxtlarda Rusiya və ABŞ arasında güləş üzrə yoldaşlıq görüşünün keçirilə biləcəyini bildirib.