Nicat Şıxəlizadə: "Cüdo şahmat deyil, bizdə sağlam rəqabət var"

Türkiyənin Antalya şəhərindəki Böyük Dəbilqədə 66 kq çəki dərəcəsində bürünc medal qazanmış Azərbaycan cüdoçusu Nicat Şıxəlizadənin müsahibəsi

- Uzun müddətdən sonra beynəlxalq yarışda medal qazandınız. Hansı hissləri keçirirsiniz?

- Uzun müddətdir özümü toparlayıb nəticə verə bilmirdim. Amma yarışlarda məğlub olmağıma baxmayaraq, özümü gücsüz və zəif hiss etməmişəm. İnanırdım ki, hansısa turnirdə yenidən medal əldə edəcəyəm. O da Türkiyədəki Böyük Dəbilqəyə qismət oldu.

- Püşkdə Orxan Səfərovla eyni qrupa düşdüyünüzü gördükdə nə düşündünüz?

- Orxan komanda yoldaşım olmaqdan əlava, həm də dostumdur. Təbii ki, mən də istəməzdim o cür qarşılaşaq. Amma bu, idmandır.

- Doğrudanmı aranızda amansız rəqabət var, yoxsa siz də şahmatda Şəhriyar Məmmədyarovla Teymur Rəcəbov kimi bir-biri ilə görüşəndə heç-heçəyə razılaşdıqları kimi, qızıl xalı gözləyirsiniz?

- Mən elə düşünmürəm. Bizim idman növü şahmat deyil (gülür - red.). Bizdə sağlam rəqabət var və davam edir. O da ancaq yarışda olur. Həyatda isə dost və qardaşıq.

- Elə isə görüşün qızıl xaladək uzanmasının səbəbi nə idi: Bir-birinizin döyüş üslubuna bələd olmağınız?

- Bəli, elə də demək olar. Həm də Orxan Səfərov zəif idmançı deyil ki, asanlıqla qalib gələsən.

- Eyni çəkidəki iki idmançı reytinqdə bir-birinə yaxın olanda, olimpiadaya lisenziyanın sahibini müəyyənləşdirmək üçün bəzən onların arasında xüsusi görüş keçirir. Böyük Dəbilqədəki duelinizi belə görüşlərdən biri adlandırmaq olar?

- Xeyr. Düşünürəm ki, bizdə reytinqdə kim öndədirsə, o da olimpiadaya gedəcək. Amma həyatdır, hər şey ola bilər. Hazırda ikimiz də lisenziya qazanmışıq. Kimin qismətində varsa, o da Tokio Yay Olimpiya Oyunlarına gedəcək.

- Orxan Səfərovun 66 kq-a keçməsi şəxsən sizə və çıxışlarınıza necə təsir etdi?

- Mənim üçün rəqibin fərqi yoxdur. Sadəcə, bir çəkidə iki lisenziya sahibi var, amma yalnız birimiz olimpiadada iştirak edə bilərik. Kimin haqqıdırsa, o da gedəcək.

- Düşünmürsünüz ki, 2007-ci ildə dopinq qalmaqalına görə uzun müddət yarışlardan kənarda qalmağınız karyeranızın daha yaxşı alınmasına maneçelik törətdi?

- Əlbəttə. Həmin dövrlərdə daha böyük nailiyyətlər qazana bilərdim. Həm də çox cavan idim. Hazırda isə yaş öz sözünü deyir.

- Yarımfinalda yaponiyalı ikiqat dünya çempionu Hifumi Abeyə uduzdunuz. Azərbaycan cüdoçularının Yaponiya təmsilçilərinə qarşı sindromu nə vaxt aradan qalxacaq?

- Hamı bilir ki, yaponiyalı cüdoçular çox güclüdür. Buna baxmayaraq, bəzi çəki dərəcələrində bizim cüdoçular da onları məğlub edə bilib.

- Artıq 33 yaşınız var. Demək olarmı ki, vəsiqə qazanacağınız təqdirdə, Tokiodakı olimpiada sizin üçün sonuncu olacaq?

- Bəli. Qismət olsa, sonuncu dəfə Yay Olimpiya Oyunlarında iştirak edəcəyəm. Nəticənin necə olacağını isə zaman göstərəcək ("Report").