Stadnik: "Dünya çempionluğunu qazananda ən zəif formamda idim"

Azərbaycanın qadın güləşi üzrə əslən ukraynalı ikiqat dünya və yeddiqat Avropa çempionu, Tokio-2020 Yay Olimpiya Oyunlarına lisenziya qazanmış Mariya Stadnikin “Report”a müsahibəsi

- Yəqin ki, Azərbaycan Güləş Federasiyasının (AGF) sərbəst güləş üzrə sabiq vitse-prezidenti və qadın güləşi üzrə milli komandanın keçmiş baş məşqçisi Maqomed Əliömərovin dünyasını dəyişməsindən xəbərdarsınız. Bu itki barədə nə deyə bilərsiniz?

- Nə deyə bilərəm?! Allah rəhmət eləsin. Başqa heç nə deyə bilmərəm.

- Onunla da birlikdə işləmisiniz. Necə baş məşqçi idi?

- Bununla bağlı heç nə danışmaq istəmirəm. Bizim onunla elə də yaxşı münasibətimiz yox idi. Sadəcə...

- Çox tələbkar idi?

- Öz səbəblərim var. Artıq bu barədə danışmaq istəməzdim. Qoy, nur içində yatsın. Bu qədər.

- Karantin dövründə nə işlə məşğul olursunuz, mövcud şərtlər altında necə məşq edirsiniz?

- Əsasən evdə hazırlaşıram. Qaçır, turnikdə müxtəlif hərəkətləri yerinə yetirirəm. Fiziki məşqlər edirəm. İdman zallarına getmək imkanım yoxdur. Bu şəkildə fiziki formamı qorumağa çalışıram.

- Koronavirus pandemiyasına görə karantin elan olunanda Azərbaycanda, yoxsa Ukraynada idiniz?

- Ukraynada idim. Həmin vaxt yerli güləşçilərin Kiyevdə təlim-məşq toplanışı keçirilirdi. Budapeştdəki Avropa Təsnifat Turnirinə hazırlaşırdıq.

- Tokio-2020 Yay Olimpiya Oyunlarının gələn ilə təxirə salınması idman formanıza necə təsir edəcək?

- Əlbəttə, bu, bir çox idmançıya ciddi təsir göstərəcək. Prinsipcə, bu təsir hər kəs üçün təxminən eyni olacaq. Çünki əksəriyyət normal məşq edə bilmir. Yaş baxımından kimlər üçünsə çətin olacaq. Gənc idmançıların isə qarşıda hələ vaxtları olacaq. Kimisi üçün mənfi, kimisi üçün müsbət tərəfləri var. Nəsə baş verirsə, deməli, belə olmalıdır. Əsas sağlamlıqdır. Bu olmadan idman, olimpiada barədə düşünməyə dəyməz. Hazırda əsas vəzifəmiz özümüzü qorumaqdır ki, yaxınlarımız, doğmalarımız da sağlam qalsınlar.

- Qeyd etdiniz ki, hazırkı vəziyyət kimlər üçünsə çətin olacaq. Sizin də yaşınız az deyil. Bu amil hansısa problem yarada bilər?

- Mən peşəkar güləşçiyəm. Bu baxımdan mənim üçün hansısa çətinlik problem deyil. Vəziyyətdən çıxmağa öyrəşmişəm. 50-60 yaşım yoxdur ki, hər hansı problem olsun. Hələ gücüm var. Ona görə də hazırkı durum mənim kimi idmançılar üçün problem deyil. 32 yaş heç nədir.

- Bəs nə vaxt pik formanızda olmusunuz: 2019-cu il dünya çempionatındamı?

- Dünya çempionluğunu qazananda ən zəif formamda idim. Olimpiadaya da yaxşı hazırlaşmaq alınmadı. Bu mənada Oyunların təxirə salınması xeyirimə oldu. Bu, mənə daha yaxşı hazırlaşmağa imkan verəcək.

- Nur-Sultanda qalib gələndə yaxşı formada deyildiniz?

- Xeyr, yaxşı formada deyildim. Çempionat ərəfəsində sonuncu toplanışda məşqçilər və komanda üzvləri də gördülər ki, özümü yaxşı hiss etmirəm. Buna baxmayaraq, toparlandım və yaxşı çıxış etdim.

- Bilirsinizmi ki, gələn il olimpiadada qızıl medal qazansanız, olimpiya "qızıl"ı əldə edən ən yaşlı qadın güləşçi olacaqsınız?

- (Gülür). Bilmirəm. Xəbərim yox idi.

- Həmçinin xəbəriniz varmı ki, bu mənada yaponiyalı güləşçi Kaori İtyonu geridə qoya bilərsiniz?

- Doğrudan?

- Bəli, Dünya Güləş Birliyinin rəsmi saytı yazıb ki, 4 qat olimpiya və 10 qat dünya çempionu Kaori İtyo Rio-2016 Yay Olimpiya Oyunlarında 32 yaş 4 ay, 3 günündə ikən 58 kq çəki dərəcəsində qızıl medal qazanıb...

- Maraqlıdır (gülür).

- Bunun öhdəsindən gələ biləcəksiniz?

- Yaşayarıq, görərik. Allah eləsin, Olimpiya Oyunları gələn il baş tutsun. Oxumuşam ki, olimpiada ləğv oluna da bilər. İlin sonunadək koronavirusla bağlı vəziyyətin düzələcəyinə ümid edək. Çünki Tokio olimpiadası keçirilməsə, heç nə alınmayacaq.

- Qadın güləşçilərdən kimi özünüzə əsas rəqib sayırsınız?

- Yəqin ki, yaponiyalıları. Çünki onlarla görüşlərim hər zaman çətin keçir və alınmır. Mənim üçün münasib rəqiblər deyillər. Amma onlardan başqa da güclü güləşçilər var.

- Bakıya nə vaxt qayıtmağı düşünürsünüz, yoxsa Ukraynada qalıb məşq edəcəksiniz?

- Hələlik Ukraynadayam. Çünki karantin dövrüdür, uşaqlarımın yanında qalmalıyam. Prinsipcə, yarışlara həmişə Ukraynada hazırlaşmışam.