Boksçumuz ermənini diz çökdürdü

Azərbaycan yığması Türkiyənin Samsun şəhərində keçirilən boks üzrə Avropa Olimpiya Təsnifat Turnirində beşinci lisenziyasını qazanıb. Futbolxeber.az saytının apasport.az-a istinadən verdiyi məlumata görə, Yana Alekseyevna (60 kq), Cavid Çələbiyev (56 kq), Lorenzo Sotomayorun (64 kq) və Məhəmmədrəsul Məcidovdan (+91 kq) sonra Abdulqadir Abdulayev (91 kq) də Rioya vəsiqəyə sahib olub.

O, bu nəticəni turnirin bürünc medalını qazanaraq əldə edib. Təmsilçimiz Avropa Oyunlarının gümüş mükafatçısı erməni əsilli ukraynalı boksçu Gevorq Manukyana qalib gəlib.

Döyüş təmsilçimizin 2:1 (30:27, 30:27, 27:30) hesablı üstünlüyü ilə nəticələnib.

Xatırladaq ki, Bakıda keçirilən Avropa Oyunlarında finalda qarşılaşmalı olan rəqiblər Manukyanın zədəsi ucbatından görüşə bilməmişdilər. Abdulqadir döyüşə çıxmadan çempion, ukraynalı isə gümüş mükafatçı olmuşdu.

Təmsilçimiz bu dəfə də erməni rəqibindən üstün olduğunu sübut edib.

Qeyd edək ki, bununla da Braziliyada keçiriləcək Yay Olimpiya Oyunlarına lisenziyalarımızın sayı 40-a, Rioya yollanacaq idmançılarımızın sayı isə 41-ə çatıb.