“Qəbələ”nin üzvü qələbəsini Şəhidlərə həsr etdi

“MMA FIGHTING SERİES” seriya yarışları davam edir. Futbolxeber.az saytının məlumatına görə, ikinci yarış bu gün “Qafqaz Baku Sport Otel”də baş tutub. Turnir "Qəbələ" İdman Klubunun və “Azerbaijan Fight Club” döyüş klubunun təşkilatçılığı, Azərbaycan Gənclər və İdman Nazirliyi və Beynəlxalq MMA GEFC liqasının dəstəyi ilə keçirilib.

“MMA FIGHTING SERİES”də Azərbaycanla yanaşı, Rusiya, İran, Ukrayna və Gürcüstan idmançıları da qüvvələrini sınayıblar. 15 çəki üzrə baş tutan döyüşlərdə "Qəbələ" 3 idmançı ilə təmsil olunub.

66 kq çəki dərəcəsində Fuad Musayev "Şəmkir" döyüş klubunun üzvü Nərbala Atakişiyevə uduzub.

Nəriman Abbasov 70 kq çəki dərəcəsində İran idmançısı ("Caspian Tigers") Said Lobatini nokautla üstələyib. Abbasov qələbədən sonra qısa çıxış edib. “Qəbələ”nin üzvü qələbəsini Şəhidlərimizə həsr etdiyini bildirib. Abbasovun bu açıqlaması zalda böyük coşqu ilə qarşılanıb.

“Qəbələ”nin digər üzvü Hüseyn Əliyev isə 77 kiloqram çəki dərəcəsində Ukraynanın "Spartak" döyüş klubunun üzvü Maksim Şilonu məğlub edib.

Qeyd edək ki, “Qəbələ” klubunun vitse-prezidenti Faric Nəcəfov da döyüşləri izləyənlər arasında olub.