Kasparov Azərbaycana gəlmək istəyir

“Dünya Kubokunda iştirak üçün Harri Kasparova dəvətnamə göndərilməyib və özünün də iştirak edəcəyi barədə məlumat yoxdur”. Futbolxeber.az-ın “Report”a istinadən verdiyi məlumata görə, bunu "Dünya Kuboku-2015" və "Bakı Şahmat Olimpiadası - 2016"nın Əməliyyat Komitəsinin direktoru və Azərbaycan Şahmat Federasiyasının (AŞF) vitse-prezidenti Mahir Məmmədov deyib.

O bildirib ki, əslən bakılı dünya çempionunun gələn il Azərbaycan paytaxtında təşkil olunacaq Ümumdünya Şahmat Olimpiadasına qonaq qismində qatılmaq istəyi var: "2013-cü ildə Türkiyənin İstanbul şəhərindəki olimpiada vaxtı qəbul keçirmişdik. Kasparov qəbula gəlmək istəyirdi və gəldi. Hətta milli yeməklərimizdən də daddı".

M.Məmmədovun sözlərinə görə, Dünya Kubokuna bir sıra tanınmış şahmatçılar qatılacaqlar. Onların arasında qadınlar arasında sabiq dünya çempionu, gürcüstanlı Nona Qaprindaşvili də olacaq.