"Bakı-2015": 5 boksçumuz 1/4 finalda

Bakı-2015 Avropa Oyunlarında boks yarışları davam edir. Futbolxeber.az-ın məlumatına görə, bu gün 5 boksçumuz 1/8 döyüşünə çıxacaq.

Kişilər

64 kq

1/16 finalda slovakiyalı Edin Seydinoviçi mübarizədən kənarlaşdıran təmsilçimiz Lorenzo Sotomayor bu dəfə moldovalı Dmitri Qalaqotla üz-üzə gəlib. Ardıcıl ikinci qələbəsini qazanan boksçumuz 1/4 finala yüksəlib.

69 kq

Pərviz Bağırov mübarizəyə 1/8 finaldan qoşulur və onun ilk rəqibi moldovalı Vasili Belusdur. Təmsilçimiz ilk döyüşündə qələbə qazanmaqla adını 1/4 finala yazdırıb. Boksçumuz 1/4 finalda almaniyalı Abass Baraou ilə üz-üzə gələcək. 

75 kq

Bu çəkidə ölkəmizi təmsil edən Xaybula Musalov 1/8 finalda fransız Kristian Haller-Assomo Mbilliylə döyüşüb. Musalov da qələbə qazanmaqla 1/4 finala adlayıb. 

91 kq

Abdulqadir Abdullayev 1/8 finalda macarıstanlı Adam Hamori ilə qarşılaşıb. Rəqibini çətinlik çəkmədən məğlub edən boksçumuz adını 1/4 finala yazdırıb.

Qadınlar

60 kq

Qadın boksçumuz Yana Alekseyevna 1/8 finalda finlandiyalı Mira Potkonenlə üz-üzə gəlib və rəqibini məğlub edib. Alekseyevna 1/4 finalda mübarizə aparmaq imkanı qazanıb.