Daha bir belçikalı cüdoçu “Bakı-2015”də iştirak hüququ qazanıb

Belçika Olimpiya Komitəsi daha bir cüdoçunun “Bakı-2015” birinci Avropa Oyunlarında iştirak edəcəyini açıqlayıb. Futbolxeber.az-ın məlumatına görə, Heydər Əliyev adına İdman Sarayında keçiriləcək yarışlarda tatami üzərinə 70 kiloqram çəki dərəcəsində Lola Mansur çıxacaq. Beləliklə, Belçikanı birinci Avropa Oyunlarında təmsil edəcək idmançıların sayı 117-yə çatıb.

İyirmi bir yaşlı cüdoçu 2012-ci və 2014-cü illərdə Belçika çempionatının qalibi olub. İdmançı, həmçinin dünya kuboku yarışlarının bürünc, 23 yaşadək cüdoçular arasında Avropa çempionatının isə gümüş mükafatçısıdır.

Belçika komandasının heyətində 13 cüdoçu Bakıda mübarizə aparacaq (“Azərtac”).