“Bakı-2015”də Türkiyədən 9 kişi və 4 qadın boksçu mübarizə aparacaq

Bakıda keçiriləcək birinci Avropa Oyunlarından medallarla qayıtmağı qarşıya məqsəd qoyan boks üzrə Türkiyə milli komandası hazırlıqlarını davam etdirir. Futbolxeber.az-ın “Azərtac”a istinadən verdiyi məlumata görə, birinci Avropa Oyunlarında Türkiyəni təmsil etməyə hazırlanan qardaş ölkənin boksçuları təlim-məşq toplanışındadırlar.

Türkiyə Boks Federasiyasının prezidenti Eyüp Gözgeç bildirib ki, ilk dəfə təşkil ediləcək Oyunların Azərbaycanda keçirilməsi bizi çox sevindirir. Birinci Avropa Oyunlarında Türkiyədən 9 kişi və 4 qadın boksçunun mübarizə aparacağını deyən E.Gözgeç bildirib: “Qardaş ölkə olan Azərbaycanda keçiriləcək birinci Avropa Oyunlarında Türkiyəni yüksək səviyyədə təmsil edərək medallar qazanmaq əzmindəyik. Azərbaycanlı azarkeşlərin idmançılarımızı dəstəkləyəcəklərinə ümid edirik”.

Birinci Avropa Oyunlarının boks yarışları iyunun 16-da başlayacaq. Final yarışları isə iyunun 27–də keçiriləcək.