Koxalski: “Mənim üçün “Qarabağ”dan getməyin ən doğru vaxtıdır”

“Qarabağ”ın qapıçısı Mateuş Koxalski komandadan ayrılması ilə bağlı açıqlama verib.

Futbolxeber.az saytının məlumatına görə, polşalı qolkiper Azərbaycan Premyer Liqasının IV turunda “Araz-Naxçıvan”ı 3:2 hesabı ilə məğlub etdikləri oyundan sonra jurnalistlərin suallarını cavablandırıb.

O, Naxçıvan klubu ilə görüşün onun üçün vacib əhımiyyət kəsb etdiyini bildirib: “Mənim üçün “Qarabağ”dakı son matç ən xüsusi oyun idi. Əsas məsələ bu oyunda “Qarabağ”ın 3 xal qazanması idi. Ümid edirəm ki, bu, çempionluq yolunda önəmli addım olacaq”.

Koxalski “Qarabağ”dan gedişini belə şərh edib: “Mənə elə gəlir ki, “Qarabağ”da iki etibarlı qapıçı var və komandanın qapısı etibarlı əllərdədir. Ona görə də düşünürəm ki, mənim üçün getməyin ən doğru vaxtıdır. Bu, asan olmadı, amma bu mənim qərarımdır və düşünürəm ki, hamı üçün yaxşı olacaq”.

Polşalı qolkiper Ağdam klubundan ayrılmaq barədə daha əvvəl qərar qəbul edib: “Bu qərarı hələ ötən mövsüm başa çatdıqdan sonra, yeni mövsüm başlamazdan əvvəl vermişdim. Çünki mənim həyatımda ən önəmli şey futbol və pul deyil. Mənim üçün həyatım və ailəm daha vacibdir. Hər səhər yuxudan oyandığım andan axşama qədər ailə mənim üçün önəmlidir. Ona görə də bu qərarı verdim”.

25 yaşlı qapıçı “Qarabağ” azarkeşlərinə və Azərbaycan xalqına təşəkkür edib: “Əslində, “Qarabağ” azarkeşlərinə, hər birinizə və ümumiyyətlə Azərbaycan xalqına təşəkkür edirəm. Demək olar ki, hər kəs mənə isti münasibət göstərdi. Ümumiyyətlə, siz məni həm qapıçı, həm də bir şəxsiyyət kimi böyütdünüz. Mən bura gələndə sadəcə adi bir qapıçı idim. Bəlkə də Polşada belə məni yaxşı tanımırdılar. Amma indi bütün ölkəmdə məni hamı tanıyır. Buna görə də sizə çox borcluyam və bütün dəstəyiniz üçün təşəkkür edirəm”.