Rəşad Sadıqov: “0:2-dən sonra oynamaq çətin idi”

“Oyuna ilk dəqiqələrdən fəal başladıq. Çalışırdıq ki, oyuna nəzarət edək. Bu da bizdə pis alınmırdı. "Sabah" isə ilk hücumunda qol vurdu. 3-5 dəqiqə keçdikdən sonra yenə kobud səhvə yol verdik. Bilmirəm, penalti epizodu penaltidir, ya yox... 0:2-dən sonra oynamaq çətin idi. Amma futbolçularım özündə güc tapıb mübarizəyə davam edirdilər”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının IV turunda “Sabah”a 0:5 hesabı ilə uduzduqları oyundan sonra deyib.

Mütəxəssis qol epizodlarından yararlana bilmədiklərini vurğulayıb: “Hesab 5:0-dır. Amma mən futbolçuların göstərdiyi oyundan ümumən narazı deyiləm. Oynayırdılar, topa nəzarət bəzən rəqibdə, bəzən bizdə idi, eyni səviyyədə olurdu. Qol epizodları yaratmaq da eyni səviyyədə idi. Onlar 6 qol epizodu yaratdılar, 5-dən istifafə etdilər. Bizdə 4-5 yaxşı qol epizodu oldu. Amma biz istifadə edə bilmirdik. Bu gün iki komanda arasında yeganə fərq bitiricilik, son zərbələr idi. Bir də, ikinci və üçüncü qolda müdafiədə buraxdığımız kobud səhvlər... Bu gün "Sabah"a qarşı fərqli oynamağa, daha hücumameyilli, açıq futbol oynamağa çalışırdıq. Oyun planında pis alınmırdı. Ancaq "Sabah" bizi bu gün bitiricilikdə üstələdi”.

R.Sadıqov ardıcıl 3 qələbədən sonra komandasında arxayınlaşma olması ehtimalı barədə sualı belə cavablandırıb: “Onu hiss etmədim. Niyə yalan deyim? Hiss etsəm, bunu deyərəm. Paltardəyişmə otağında da futbolçulara bildirdim ki, oyundan, davranışdan, mübarizədən narazı qalmadım. İkinci və üçüncü qolu çox sadə buraxdıq, özümüz də xeyli qol epizodu qaçırdıq. "Sabah"ın gücü isə hamıya bəllidir. Buna baxmayaraq, futbolçularım meydanda yaxşı oynadılar. Hesab 5:0 olsa da, mən bu oyundan pozitiv enerji ilə ayrılıram. Futbolçular, məşqçilər heyəti də bu oyundan lazımi nəticəni çıxaracaq, səhvlər üzərində daha çox işləyib, daha güclü geri dönəcəyik”.