Füzuli Məmmədov: “İlk oyununda qələbə psixoloji cəhətdən olduqca vacibdir”

“Oyuna ciddi hazırlaşmışdıq və qələbəni çox istəyirdik. İlk oyunun çətin keçəcəyini bilirdik. Çünki həm taktiki cəhətdən, fərdi keyfiyyət baxımından hazırlıqlı komandaya qarşı oynadıq”.

Futbolxeber.az saytının məlumatına görə, bu sözləri “Şahdağ-Qusar”ın baş məşqçisi Füzuli Məmmədov deyib.

I Liqanın ilk turunda səfərdə MOİK üzərində qazanılan 1:0 hesablı qələbəni şərh edən təcrübəli mütəxəssis futbolçularından razılığını ifadə edib: “Meydana çıxmazdan əvvəl bizi necə ağır bir mübarizənin gözlədiyinin fərqində idik. İlk qələbə bizim üçün çox önəmli idi. Bu gün meydanda doğrudan da sona qədər döyüşən, təslim olmayan və xarakter göstərən bir komanda var idi. Futbolçularımın hər biri tapşırıqları canla-başla yerinə yetirdi və bu vacib qələbəni tam layiqi ilə qazandıq. Oyundan-oyuna komandamızın daha da yaxşı olacağına inanıram. Göstərdikləri bu əzmkar mübarizəyə görə futbolçularıma dərin təşəkkürümü bildirirəm”.

O, komandadakı çatışmazlıqlardan da söz açıb: “Birinciliyin ilk oyununda qələbə psixoloji cəhətdən olduqca vacibdir. Futbolçularda özünə inam hissini artırır. Amma dediyiniz kimi, çatışmazlıqlar da üzə çıxır. Əlbəttə, onları qarşıdakı oyunlarda aradan qaldıracağıq. Bu istiqamətdə işlərimiz mütləq eyni tempdə davam edəcək. Meydandakı fiziki və taktiki mübarizə qədər, oyunçuların zehni olaraq da bu çətin turnirə hazır olması bizim üçün çox vacibdir”.

Məmmədov qaçırılan qol epizodlarına da toxunub: “Doğrudur, bu gün bir qol vurduq, amma daha çox qol epizodumuz var idi. Bu oyunda biz üç, hətta dörd qol da vura bilərdik. Təəssüf ki, o şanslardan tam yararlana bilmədik. Qarşıda hələ görüləsi işlərimiz var. Onlardan da biri bitiriciliklə bağlıdır ki, bunun da üzərində işləyəcəyik”.

“Şahdağ-Qusar”ın çalışdırıcı kollektiv daxilində ailə formalaşdırdıqlarını vurğulayıb: “Komandaya legionerlər cəlb olunub. Amma onlar ümumi işin bir hissəsini yerinə yetirir. Burada vahid bir ailə var. Yerli futbolçularımız da daxil olmaqla, çox layiqli bir heyətimiz var. Hər kəs öz işini görür, intizamlıdılar. Hamı qarşımızda duran məqsədimizin nə olduğunu çox yaxşı bilir və biz sadəcə, bir hədəf üçün çalışırıq”.

Sonda Füzuli Məmmədov növbəti turda sabiq klubu “Karvan-Yevlax”a qarşı keçiriləcək oyundan danışıb: “Ötən mövsüm “Karvan-Yevlax”ın Premyer Liqanı tərk etməsi təəssüf doğurdu. Bildiyiniz kimi, çempionat başa çatdıqdan sonra rəhbərliklə söhbətimiz oldu və əməkdaşlığa son vermək qərarına qəldik. Mənim üçün “Karvan-Yevlax”da, Yevlax şəhəri də doğmadır. Amma bu, futboldur. Məşqçilər də, futbolçular da bu gün ona doğma olan komandaya sabah rəqib ola bilər. Bu üzdən növbəti oyunda hazırlıqda hansısa qeyri-adilik olmayacaq. “Karvan-Yevlax”la matça digər oyunlara hazırlaşdığımız kimi yanaşacağıq. Onu da qeyd edim ki, rəqib də bizim kimi Premyer Liqanı hədəfləyib, yaxşı heyət qurublar. Gərgin və maraqlı mübarizənin olacağını gözləyirəm”.