“Neftçi”nin yeni transferi: “Atam həmin futbolçunun fanatı olduğu üçün məni belə adlandırıb”

“Neftçi”nin yarımmüdafiəçisi Qustavo Klismanın Futbolxeber.az saytına müsahibəsi

- UEFA Konfrans Liqasının ilk matçında Minsk “Dinamo”suna 2:4 hesabı ilə uduzdunuz. Qarşılaşmanı necə şərh edərdiniz?

- Meydana qələbə üçün çıxmışdıq. Matça da əla başladıq. Erkən qollar vurduq. Lakin 25-30-cu dəqiqənin tamamında sanki meydanda dayandıq. Yekunda da bunun acısını çəkdik.

- Yarım saatın tamamında dayanmağınıza səbəb nə idi?

- Konkret səbəb göstərməkdə çətinlik çəkirəm. İlk oyun idi. Nə baş verdiyini başa düşmədik. Fərdi səhvlər etməyə başladıq. Bu da yekunda belə bir nəticəyə gətirib çıxardı.

- İkinci hissədə əla zərbə vursanız da, top üst dirəyə tuş gəldi. Həmin anı matçın qırılma nöqtəsi saymaq olar? Çünki hücumun davamında rəqib üçüncü qolu vurdu...

- Razıyam, qol olsaydı, yenidən hesabda önə keçəcəkdik. Qələbə qazana bilərdik. Əslində hesabda geri düşdükdən sonra da şanslarımız çox idi. Lakin yararlana bilmədik.

- Mərhələ adlayacağınıza ümid qalıb?

- Əlbəttə, şansımız var. Həftə boyun məşqlərdə səhvlərimiz üzərində işləyəcəyik. Səfərə yalnız mərhələ adlamaq üçün gedəcəyik. İnanıram ki, səhvləri aradan qaldırıb geridönüş edəcəyik.

- Bəlkə fikriniz “Braqa”nın yanında qalıb?

- Əlbəttə ki, yox. Hər oyuna məsuliyyətlə yanaşmaq lazımdır. Yalnız mərhələni keçəndən sonra “Braqa”, yaxud başqa rəqib haqda danışmaq olar.

- “Dinamo” ilə görüş “Neftçi”dəki ilk rəsmi matçınız idi. Doğma publika necə təsir bağışladı?

- Azarkeşlərə təşəkkür edirəm. Onlar əvvəldən sona kimi bizi dəstəklədilər, qələbəyə səsləydilər. Təəssüf ki, onları sevindirə bilmədik. Buna görə fanatlardan üzr istəyirik. Lakin hələ heç nə bitməyib. Qarşıda cavab oyunu var.  

- Braziliyalı olsanız da, ad və soyadınızda Klisman var. Maraqlıdır, bu, nədən irəli gəlir?

- Atam Almaniya millisinin sabiq üzvü Yurgen Klinsmanın fanatı olub. Bu səbəbdən də mənə Klisman adlandırıb (gülür).