ÇSKA-nın baş məşqçisi: “Qələbəyə inanırıq”

“Bu, bizim üçün çox vacib oyun idi. Futbolçularımız yaxşı mübarizə apardılar. Cavab görüşündə də belə çıxış edəcəklər. Onların motivasiyası yüksək idi, çünki ailələri oyunları izləyir”.

Futbolxeber.az saytının məlumatına görə, bu sözləri Bolqarıstanın ÇSKA klubunun baş məşqçisi Xristo Yanev Avropa Liqasının 2-ci təsnifat mərhələsinin ilk oyununda Bakıda “Qarabağ”la 0:0 hesablı heç-heçə haqda danışarkən deyib.

O, matçdan sonra keçirilən mətbuat konfrasında nəticədən razı qaldığını və cavab matçında mərhələni keçmək istədiklərini bildirib: “Hər bir rəqibə hörmətlə yanaşırıq. Amma hər zaman planlaşdırdığın kimi oynamaq olmur. Bolqar jurnalistlərin heç-heçəyə görə məni alqışlamasına gəlincə, “Qarabağ” çox güclü komandadır. Bunu hamı bilir. Onlar başa düşürdülər ki, hadisələr başqa cür də inkişaf edə bilərdi. Heç-heçə bizim üçün yaxşı nəticədir. Fasilədə futbolçulara ehtiyatlı davranmağı tapşırdım. Qol buraxmamağın vacibliyindən danışdıq. Biz bura qələbə üçün gəlmişdik. İndi isə cavab oyununda qalib gəlib mərhələ adlamaq istəyirik. Evdə azarkeşlərimiz bizi dəstəkləyəcək. Heyətdə müəyyən dəyişikliklər edəcəyik, stadion tam dolu olacaq. Qələbəyə inanırıq”.

Qeyd edək ki, ÇSKA ilə “Qarabağ” arasında cavab matçı iyulun 30-da Sofiyada keçiriləcək.