“Dinamo”nun baş məşqçisi: “Qələbəyə hazırlaşmışdıq, bunu da etdik”

"Bu cür əla komandaya qalib gəlmək xoşdur. Qalibiyyətə görə şadıq. Amma optimist qalmalıyıq. Bəli, üstünlüyümüz var. Amma o qədər də böyük deyil. Rəqib ikinci oyun üçün nəyisə dəyişəcək. Biz özümüz də səhvlərimizi aradan qadırmağa çalışacağıq. İkinci oyunu gözləyəcəyik"

Futbolxeber.az saytının məlumatına görə, bu sözləri Minsk "Dinamo"sunun baş məşqçisi Aleksandr Şaqoyko Konfrans Liqasının 2-ci təsnifat mərhələsində "Neftçi"yə 4:2 hesabı ilə qalib gəldikləri matçdan sonra təşkil olunan mətbuat konfransında deyib.

O, oyundan əvvəl də komandasından qələbə gözlədiyini söyləyib: "Dörd qol vuracağımıza inanmaya bilərdim. Amma biz 7 dəqiqəyə iki qol buraxacağımızı da planlaşdırmırdıq. Lakin qələbəyə hazırlaşmışdıq. Bunu da etdik. Kiminlə oynayacağımızı bilirdik. Hər şey plan üzrə getdi".

Mütəxəssis cavab görüşü haqda fikirlərini bölüşüb: "Qeyri-adi optimizm yoxdur. Futbolçularım da bunu əla başa düşür. Super üstünlüyümüz yoxdur ki, artıq indidən növbəti mərhələ haqda danışaq. Öz imkanlarımızı bilirik, rəqibə də hörmətlə yanaşırıq. İki top fərqi ən təhlükəli top fərqidir. Çünki buraxdığınız bir qol hər şeyi bir anda sizə qarşı çevirə bilər. Çox ağır oyun olacaq. Ciddi hazırlaşacağıq. Başqa cür olmaz. Demişdim ki, məqsədimiz növbəti mərhələyə adlamaqdır".

A.Şaqoyko "Bundan sonra "Neftçi" səddini keçə bilməsəniz, sizin üçün faciə hesab olunacaq" sualını belə cavablandırıb: "Bizim üçün istənilən məğlubiyyət faciədir. Biz qələbə üçün oynayırıq. Meydana uduzmaq üçün çıxmırıq. Düzdür, tam faciə deməzdim, amma "Neftçi"yə uduzsaq, çox pis olarıq. Hər bir idmançı udmaq üçün oynayır".