Emin Mahmudov: “İndi “Braqa” barədə düşünmürük”

Sabah “Neftçi” UEFA Konfrans Liqasının ikinci təsnifat mərhələsi çərçivəsində öz meydanında Minsk “Dinamo”sunu qəbul edəcək.

Futbolxeber.az saytının məlumatına görə, bu gün təşkil edilən oyunöncəsi mətbuat konfransında “ağ-qaralar”ın kapitanı Emin Mahmudov da iştirak edib.

- "Turan Tovuz" avrokuboklara buraxılmadı deyə, Konfrans Liqasına 2-ci təsnifat mərhələsindən başlayırsınız. Oyuna necə hazırlaşmısınız?

- İkinci mərhələdən başlayacağımızı gözləmirdik. Bizim üçün daha çox vaxt oldu hazırlaşmağa. Bu, sabahkı oyuna mane olmayacaq. Yaxşı hazırlaşmışıq. 

- "Neftçi"nin 90 illiyidir. Bu səbəbdən də hədəf həm çempionluq, həm də qrup mərhələsidir. Bu iddialar nə dərəcədə realdır? "Dinamo" haqda fikriniz necədir? 

- 90 illiyimizə görə böyük motivasiyaımzı var. Çox vacib mövsümdür. İndi "Braqa"nı düşünmürük. "Dinamo"ya hörmətlə yanaşırıq. Cavan komandadır. Yaxşı oynayırlar. Onları keçək, sonra oyundan-oyuna düşünəcəyik.

- Açıq məşqdə çoxlu azarkeş oldu. Onlara sözünüz var?

- Möhtəşəm atmosfer var idi, böyük motivasiya verdilər bizə. Azarkeşlərimiz daim bizimlədirlər. Əlimizdən gələni etməliyik ki, daha çox sevinsinlər. Oyundan qabaq da bizə motivasiya verdilər. Onlara təşəkkür edirəm. Allah qoysa, biz də onları sevindirməliyik.

- Ötən mövsümlə müqayisədə “Neftçi” nə dərəcədə dəyişib?

- Əvvəlki illərə baxanda, indi çox oyunçu dəyişməyib. Baş məşqçi də, 70 faiz heyət də eynidir. Bu il daha stabillik görürəm. Bəzi oyunçular da gələcək. Məncə, daha yaxşı olmalıyıq.