“Sabahın Ulduzları”, xoş gəlir avazları

Dünən AFFA və Bakı Futbol Federasiyasının (BFF) birgə təşkilatçılığı ilə həyata keçiriləcək “Sabahın Ulduzları” layihəsi çərçivəsində yeni sponsorlarla əməkdaşlığa dair imza mərasimi, eyni zamanda məlumatlandırma sessiyası keçirildi. “Alpex” yarışın əsas sponsoru olacaq. Özəl şirkətlərin bu cür layihələrə dəstək göstərməsi sevindirici haldır. Ümumiyyətlə, Azərbaycan futboluna nə qədər çox sponsor cəlb edilsə, bir o qədər faydalıdır.

“Sabahın Ulduzları” layihəsinin “həyata dönməsi” sevindirici haldır. Tədbirdə də qeyd edildiyi kimi, illər öncə təşkil edilən bu yarış Azərbaycan futboluna onlarla yeniyetməni qazandırıb. Bu gün üzdə olanların bir qismi ilk dəfə məhz bu turnirdə parlayıblar. Bir sözlə, təşəbbüs gözəldir. Amma əmmaları da yox deyil.

Birincisi, turnirin zamanı uyğun seçilməyib. 1 avqust-27 sentyabr. Məlum məsələdir ki, Azərbaycanda sentyabrın 15-nə qədər məktəblərdə tətildir və uşaqların hərəsi bir yerdə olur. Kimisi istirahət üçün valideynləri ilə ölkə xaricinə üz tutur, kimisi rayonlara, kimisi də nənəsinin-babasını yanına gedir. Belədə bütün futbolçuların turnirdə iştirakı sual altına düşür.

Ümumiyyətlə, görünən odur ki, budəfəki “Sabahın Ulduzları” bir yarışdan daha çox oktyabrda Azərbaycanda keçiriləcək FİFA U-15 dünya çempionatı üçün seleksiya xarakteri daşıyır. Əks halda yarış niyə tez-bazar keçirilsin ki? Çünki daha əvvəl “Sabahın Ulduzları” uzun müddət davam edirdi və oyunlar şənbə-bazar günü keçirilirdi. İndi turniri tələm-tələsik keçirmək dediyimiz kimi, açıqlanmasa da, böyük ehtimalla, məhz U-15 dünya çempionatına hesablanıb. Ümid edək ki, növbəti turnirlər hansısa yarışa deyil, həqiqətən də “Sabahın Ulduzları”nın aşkarlanmasına hesablanacaq.

Vaxtı ilə “Sabahın Ulduzları” turnirində “Neftçi” ilə yanaşı, “Bakı”, “İnter” kimi komandalar əsas iddialılar idi. Təəssüf ki, bu gün nə “Bakı” var, nə də “İnter” (hüquqi cəhətdən “Şamaxı” “İnter”in xələfi olsa da, bu iki klub arasında yerlə göy qədər fərq var). Belədə adam istər-istəməz pessimistliyə qapılır. Düşünürsən ki, yarışı bərpa etmək olar. Amma futbolçu yetişdirən o klublar yoxdursa, lap gündə bir yarış keçir, nə faydası... Təki biz yanılaq...

İBRAHİM