Cenk Sümer: “Qarşımıza çempionluq hədəfi qoymuşuq”

Bu gün “Neftçi”nin azarkeşlər və jurnalistlər üçün açıq məşqi keçirilib.

Futbolxeber.az saytının məlumatına görə, “ağ-qaralar”ın baş icraçı direktoru Cenk Sümer media üçün brifinq keçirib. Türkiyəli funksioner əvvəlcə “ağ-qaralar”ın 2026/2027 mövsümündəki hədəflərindən söz açıb:

“Qarşımıza çempionluq hədəfi qoymuşuq. Klub dəyişiklikdən keçir. Təzə komanda qurmaq bir mövsümdə alınmır. Heyətə yeni oyunçular cəlb olunub. Axtarışlarımız davam edir. "Neftçi"nin 90-cı ilində çempion olmaq istəyirik. Avrokubokda da iddialıyıq. Çempion olmaq üçün əlimizdən gələni edəcəyik. Buna inanırıq”.

O, ədalətli mövsüm keçməsini arzulayıb: “Klublarımıza avrokuboklarda uğurlar arzulayıram. Biz təlim-məşq toplanışını başa vurmuşuq. Futbolçular çox sayda məşqlər ediblər. Yeni transferlərimiz də var. Yoxlama oyunlarında meydana çıxdılar. Baş məşqçimiz və futbolçular hər şeydən razıdırlar".

Sümer ötən mövsüm icarə əsasında heyətdə yer alan Freddi Varqası transfer etmək istədiklərini söyləyib: “Varqas ötən mövsüm yaxşı təsir bağışlayıb. Danışıqlar davam edir. Müsbət yekunlaşacağına inanıram. Amma müqavilə imzalanmadan nəsə demək olmur”.

Baş icraçı direktor avrokubokda Liqa mərhələsinə vəsiqə qazanmaq istədiklərini vurğulayıb: “Liqa mərhələsinə vəsiqə qazanmaq niyyətindəyik. Amma bu, heç də asan deyil. Bütün komandaların məqsədləri var. Avrokuboklarda yaxşı nəticələrə nail olacağımıza inanıram".