“Dinamo” “Karvan-Yevlax”dan AFFA və UEFA-ya şikayət edə bilər

“Dinamo” klubu “Karvan-Yevlax”dan AFFA və UEFA-ya şikayət edə bilər.

Futbolxeber.az saytının məlumatına görə, buna səbəb Yevlax klubunun qarşı tərəfə etməli olduğu ödənişi yubatmasıdır.

Belə ki, iki klub arasında 1 aprel 2025-ci il tarixdə U-17 və U-19 komandalarına görə Əməkdaşlıq müqaviləsi bağlanıb. Müqavilə imzalanmasına səbəb “Karvan-Yevlax”ın Premyer Liqada çıxış etmək üçün Azərbaycan futbol klublarının lisenziyalaşdırılması qaydalarına əsasən (Maddə 20-S.03) meyarların tələblərinə cavab verən aşağı yağ qruplarında komandası olmaması idi. Belə ki, “Karvan-Yevlax” 2025/2026-cı il mövsümündə Premyer Liqasında çıxış etmək üçün minimum iki yaş qrupu üzrə komandaya malik olmalı idi. Lakin “Karvan-Yevlax”ın aşağı yaş qrupları üzrə komandaları mövcud olmadığı üçün “Dinamo” ilə əməkdaşlıq müqaviləsi bağlanmış və bu əməkdaşlıq müqaviləsinə görə həmin meyarların tələbləri yerinə yetirilmişdir. Bununla da, Yevlax klubu Azərbaycan Premyer Liqasında çıxış etmək üçün lisenziya qazanmışdır.

Əməkdaşlıq müqaviləsinə əsasən, “Karvan-Yevlax” “Dinamo” klubuna hər ay müəyyən vəsait ödəməli idi. AFFA isə “Karvan-Yevlax”a gənclər komandalarına görə illik 500 000 (beş yüz min) manat vəsait ayırır. “Dinamo”ya ödənilən vəsait AFFA-dan “Karvan-Yevlax”ın gənclər komandasına görə ayrılan məbləğin 9.6 faizini təşkil edir.

Məlum olduğu kimi, “Qarabağ”ın UEFA Çempionlar Liqasında çıxışına görə Azərbaycan Premyer Liqasında çıxış edən 11 klubun hər birinə UEFA həmrəylik proqramı çərçivəsində 1.6 milyon manat vəsait ödəyəcəkdir. “Karvan-Yevlax”la “Dinamo” arasında bağlanmış əməkdaşlıq müqaviləsinə görə UEFA-dan daxil olacaq vəsaitin 9.6 faizinin ekvivalenti qədər məbləğ qarşı tərəfə ödənilməlidir. Lakin bu günə qədər Yevlax təmsilçisi “Dinamo” qarşısında öhdəliyini təmin etməyib. Bu günlərdə “Dinamo” klubu növbəti dəfə ödənişin təmin  edilməsi ilə bağlı qarşı tərəfə müraciət edib. Bildirilib ki, əgər “Karvan-Yevlax” ödənişi təmin etməsə, “Dinamo” AFFA və UEFA-ya şikayət edəcək.

Görünən odur ki, “Dinamo” klubu tələbində haqlıdır. Çünki yuxarıda da qeyd etdiyimiz kimi, təxminən 1 il əvvəl tərəflər arasında əməkdaşlıq müqaviləsi imzalanmasaydı, Yevlax klubu da Premyer Liqada iştirak hüququ qazanmayacaq, belədə də avtomatik olaraq UEFA-nın həmrəylik proqramı çərçivəsində 1.6 milyon manat vəsait əldə edə bilməyəcəkdi.