“Söz verirəm ki, ya Çexiya ilə oyunda, ya da finalda mən də qol vuracağam"

“Bütün xalqımızı təbrik edirəm. Ağır oyun alındı. Layiqli qələbə qazandıq. Bundan sonra da asan qarşılaşma olmayacaq. Artıq bu görüşü unutmalı və növbəti matç haqqında düşünməliyik. Buradan çempion kimi getmək istəyirik".

Futbolxeber.az saytının məlumatına görə, bu sözləri minifutbol millimizin qapıçısı Ağaseyid Qasımov Slovakiyada keçirilən Avropa çempionatının 1/8 finalında Qazaxıstanı məğlub etdikləri oyun (3:2) barədə danışarkən deyib.

Təcrübəli qolkiper rəqibin sərt oyununa da münasibət bildirib: "Qazaxıstan komandasının belə sərt oynayacağını gözləyirdik. Üçüncü dəfədir ki, onlara qarşı mübarizə aparırıq. Bütün oyunlarda sərt mübarizələr görmüşük. Buna da hazır idik, öhdəsindən gəldik və layiqli qalibiyyət əldə etdik".

A.Qasımov 1/4 finalda Çexiyaya qarşı keçirəcəkləri görüşdə şansları dəyərləndirib:

"Bu komanda ən yaxşı rəqiblərdən biridir. Xalqımızı sevindirmək və çempion olmaq üçün əlimizdən gələni edəcəyik. Söz verirəm ki, ya Çexiya ilə oyunda, ya da finalda mən də qol vuracağam".

Qeyd edək ki, Çexiya - Azərbaycan oyunu bu gün, Bakı vaxtı ilə saat 00:00-da start götürəcək.