UEFA-dan “Turan Tovuz”a qarşı anormal yanaşma...

Son günlər “Turan Tovuz” ətrafında baş verənlər üzücüdür. Qeyri-rəsmi məlumata görə, 7 il əvvəl Tovuz klubunun bir neçə futbolçusunun danışılmış oyunda iştirakı komandanın qarşıdakı mövsümdə avrokuboklarda çıxışına əngəl olur.  

Amma kim nə deyir desin, UEFA həqiqətən də Tovuz klubunun Avropaya gedən yolunu kəssə, bunun adı biabırçılıq, rəzillik olacaq. İnsanların 1 il ərzində çəkdiyi əziyyəti yerə vurmaq olmaz. Üstəlik, belə bir şey var idisə, qitə futbol qurumu niyə Tovuz klubuna lisenziya verirdi? Yox, lisenziya verilibsə, komanda indi necə kənarda qala bilər?

Bir sözlə, suallar çoxdur.

İndiki məqamda AFFA-nın da üzərinə iş düşür. Onsuz da son iki ildə assosiasiya ciddi bir iş görməyib, heç olmasa hazırkı məqamda "Turan Tovuz"a dəstək olsunlar.

Bu məsələdə ən anlaşılmaz məqam odur ki, əgər "Turan Tovuz" günahkardırsa, komanda Premyer Liqada necə çıxış edir? Necə ola bilər ki, hansısa komanda daxili birincilikdə çıxış edir, amma UEFA yarışlarına buraxılmır? Yox, ölkə çempionatına çıxışında problem yoxdursa, UEFA yarışlarına niyə buraxılmasın? Bir sözlə, UEFA-nın yanaşması çox anormaldır...

İBRAHİM