Azərbaycan futbolunda heç vaxt heç vaxt demə...

Əfran İsmayılov deyib ki, “Azərbaycanlı futbolçunun istədiyi məbləğə iki legioner gətirərəm”. Maraqlıdır, Əfran İsmayılov özü oynayanda aldığı pula neçə legioner gətirmək olardı? Sadəcə indikilərdən fərqli olaraq həmin “pokoleniya”nın bəxti onda gətirdi ki, o zaman çempionatda limit var idi...

Heç yadımdan çıxmır, Əfran İsmayılov və Rauf Əliyev “Bakı” ilə 1 illik 400 minə müqavilə imzaladılar (sağlıqlarına qismət), əvvəldə babat “podyomnı” aldılar, bir ay sonra vəziyyət pisləşdi, “Futbol+”a müsahibələrində demişdilər ki, “məşqə gəlməyə pulumuz yoxdur”...

Azərbaycan futbolu bax budur...

Mövsüm ərzində iki dəfə Elgiz Kərəmlinin “Şəfa”nın baş məşqçisi postundan göndəriləcəyini yazdıq. Birində dərhal “cavab verdilər ki” Adil Şükürov “Səbail”dən göndəriləcək... İkincidə isə 1-2 nəfər məni “Azərbaycanlı məşqçilərin düşməni” elan etdi. Halbuki yerinə Aftandil Hacıyevin gələcəyini yazmışdıq. Sanki Aftandil bəy azərbaycanlı yox, Cibuti vətəndaşıdır... Düzdür, Aftandil bəylə maaş məsələsində razılığa gələ bilmədilər və deyəsən, seçim Zaur Həşimov oldu (açığı, həmişə məndə elə təəssürat yaranıb ki, sanki Aftandil Hacıyev-Zaur Həşimov-Ayxan Abbasov üçü eyni məşqçidir).

Zaman göstərdi ki, biz qərəz, yalan yazmırıq. Bizim sadəcə demək istədiyimiz o idi ki, “Şəfa”nı fövqəl bir klub kimi təqdim etməyə ehtiyac yoxdur. Bəli, sağlıqlarına qismət, yaxşı büdcələri var. Amma pul Azərbaycan futboluna peşəkarlıq gətirsəydi, son 22 ildə heç olmasa futbolumuz 22 addım irəli gedərdi. Əslində isə klub olaraq “Şəfa”nın “İmişli”dən, “Şahdağ-Qusar”dan (məsələn) fərqi yoxdur. Yoxsa ki, Elgiz Kərəmli ilə bizim nəinki hansısa problemimiz var, heç tanışlığımız belə yoxdur. Baxmayaraq ki, Elgiz bəy 86 sayta açıqlama verdi, hamısında az qala bizi yalan yazmaqda ittiham edirdi...

Sözümüzün canı odur ki, Azərbaycan futbolunda “heç vaxt heç vaxt demə”(yin).

“Səbail”i böyrü üstə qoyanlardan biri Cavid Hüseynov bu gün “Araz-Naxçıvan”a baş məşqçi gəlirsə, nə desən olar...   

İBRAHİM