Toral Bayramov "Qarabağ"la belə vidalaşdı

"Qarabağ"dan ayrılaraq Türkiyənin "Bursaspor" klubuna keçən Toral Bayramov keçmiş komandası haqqında paylaşım edib.

Futbolxeber.az saytının məlumatına görə, Azərbaycan millisinin müdafiəçisi instaqram səhifəsindəki paylaşımında Ağdam klubu ilə vidalaşıb:

“Bu gün sözləri seçmək asan deyil. Bu forma ilə keçən illər ərzində təkcə futbol oynamadım, böyüdüm, öyrəndim və unudulmaz xatirələr qazandım. Mənə güvənən hər kəsə – rəhbərliyə, məşqçilərə, komanda yoldaşlarıma və hər zaman yanımda olan azarkeşlərə təşəkkür edirəm. "Qarabağ" mənim üçün sadəcə klub olmadı, həyatımın bir hissəsinə çevrildi.

Doğma "Qarabağ"ı çempion kimi tərk etmək istəyərdim. Olmadı... Əvəzində Çempionlar Liqasında tarix yazıldı! Çətin qərar oldu, həm mənim, həm də rəhbərlik üçün. İstəyimi nəzərə alıb mənim keçidimi anlayışla qarşılayan rəhbərliyə xüsusi təşəkkürümü bildirirəm.

Hər son yeni başlanğıcdır. Görüşənədək, Uğurlar "Qarabağ"!