Rövlan Muradov: “Mövsüm mənim üçün yaxşı alınmadı”

“Motivasiya ilə bağlı problem yox idi. Görüşə ciddi hazırlaşmışdıq. Çünki hər birimiz peşəkarıq. Hər oyun bizim üçün imtahandır, sınaqdır. Əfsuslar olsun ki, bəzi epizodlardan yararlana bilmədik. Bu da yekunda məğlubiyyətimizə səbəb oldu”.

Futbolxeber.az saytına müsahibəsində bu sözləri “Zirə”nin yarımmüdafiəçisi Rövlan Muradov Azərbaycan Premyer Liqasında mövsümün sonuncu – 33-cü turunda “Araz-Naxçıvan”a 2:3 hesabı ilə uduzduqları oyun barədə danışarkən deyib.

O, mövsümün müəyyən qədər komandası üçün uğursuz alındığını bildirib: “Mövsümün komandamız üçün tam uğursuz olduğunu düşünmürəm. Çünki bəzi oyunlarda bəxtimiz gətirmədi, bəzi matçlarda epizodlardan yararalana bilmədik. Təbii ki, avrokuboklara vəsiqə qazana bilməmişiksə, razı qala bilmərik. Kubokda finala qədər irəlilədik. Təəssüf ki, həlledici qarşılaşmada uduzduq”.  

28 yaşlı futbolçu cari mövsümdəki çıxışından razı qalmadığını söyləyib: “Ümumi olaraq çempionat gərgin keçdi. Özümlə bağlı isə deyə bilərəm ki, mövsüm mənim üçün yaxşı alınmadı. Bir müddət zədəli oldum, sonradan toparlanmaq çətin oldu. İnanıram ki, qarşıdakı çempionatda özümü maksimum dərəcədə yaxşı tərəfdən göstərə biləcəm”.

R.Muradov bütün fikrinin hazırkı klubu ilə bağlı olduğunu vurğulayıb: “Zirə” ilə hələ bir illik müqaviləm var. Ona görə də qarşıdakı mövsümdə də burada çıxış edəcəm. Bütün planlarım hazırkı klubumla bağlıdır. Başqa heç bir plan yoxdur”.