I Liqada mingəçevirli və zaqatalalı azarkeşlər fərqləndi

I Liqada 2025/26 mövsümünün oyunlarını 25 min 710 tamaşaçı izləyib.

Futbolxeber.az saytının PFL-ə istinadən verdiyi məlumata görə, nəticəsi ləğv olunan “Zaqatala” - MOİK matçı nəzərə alınmaqla baş tutan 135 görüşdə orta göstərici 190-a bərabər olub.

Sonuncu – 27-ci turun “Mingəçevir” – “Səbail” görüşü mövsümün ən çox izləyici toplayan qarşılaşması olub. Mayın 22-də Y.Məmmədzadə adına Mingəçevir şəhər stadionunda baş tutan görüşü 2750 tamaşaçı seyr edib.

Mövsüm ərzində daha 4 dəfə bu göstərici 1000-ə bərabər olub. Bu matçların hamısına “Mingəçevir” ev sahibliyi edib.

14 görüşdə 11 min 520 seyrçi toplayan komanda bu göstəricidə böyük üstünlüklə hamını qabaqlayıb. 1-ci Liqadakı ümumi tamaşaçı sayının təxminən 45 faizi “Mingəçevir”in payına düşür.

Orta tamaşaçı sayında “Zaqatala” 2-ci yeri tutub. “Şəfa” 3-cü, “Səbail” isə 4-cü olub.