Baş katibin “irəliləyişi” - Avropada ən zəif nəticə

Ötən həftə 19 yaşadək qadın futbolçulardan ibarət Azərbaycan millisi Avropa çempionatının seçmə mərhələsində mübarizə apardı. Əslində, buna mübarizə aparmaq da demək olmur. Çünki yığmamız Xorvatiyaya sanki turist kimi yollanmışdı. Hər halda qeydə alınan nəticələr belə düşünməyə əsas verir.

Əvvəla, ondan başlayaq ki, millimiz seçmə mərhələnin B liqasında çıxış edirdi. Yəni burada Avropanın qadın futbolunda aparıcı futbol ölkələri olan İspaniya, İngiltərə, Almaniya, Fransa, İsveç, Niderland kimi yığmalar yox, ən zəif 24 kollektiv 6 qrupda çıxış edirdi.

Altıncı qrupda yer alan Azərbaycan millisi əvvəlcə Çexiyaya 0:6, daha sonra Xorvatiyaya 0:9, son matçda isə Gürcüstana 1:4 hesabı ilə uduzdu. Yekun nəticədə xal üzünə həsrət qalan yığmamızın top fərqi də 1-in 19-a oldu.

Digər qruplara nəzərə saldıqda məlum olur ki, Azərbaycan yığması kimi, San Marino, Qazaxıstan, Ermənistan və Lixtenşteyn milliləri də xala həsrət qalıblar. Lakin millimizlə müqayisədə bu komandaların top fərqi daha abırlıdır. San Marino 3 qolun qarşılığında qapısında 11 qol görüb, Qazaxıstanda bu göstərici 1-9-dur. Ermənilər də 3 görüşdə cəmi 1 qol vursalar da, öz qapılarında 10 top görüblər. Lixtenşteyn yığması isə fərqlənə bilməsə də, öz qapısından millimizlə müqayisədə daha az (14) top buraxıb.

Bu nəticəyə əsasən demək olar ki, Azərbaycanın qadınlardan ibarət U-19 yığması Avropada ən zəifdir. Görəsən, belə biabırçı milli komanda kimə, nəyə lazımdır? Təbii ki, biz 19 yaşlı xanımlarımızdan möcüzə gözləmirik. Əslində, bu nəticə geniş müzakirə mövzusu da olmazdı. Əgər AFFA-nın sonuncu Hesabat Konfransında assosiasiyanın baş katibi Cahangir Fərəcullayev ölkəmizdə qadın futbolunun inkişafından ağızdolusu danışmasaydı: “Qadın futbolunda ciddi irəliləyiş var. Millimiz beynəlxalq turnirinin qalibi oldu”.

Görəsən, Cahangir bəy irəliləyiş deyəndə Azərbaycanın U-19 yığmasının Avropanın ən zəifi olmasını nəzərdə tutur? Axı bu, irəliləyişdən daha çox geriləməyə bənzəyir.

Bəli, əsas milli U-19-a baxanda “toya getməlidir”. Lakin AFFA-nın hazırkı rəhbərliyinin həmin komandanın nəticələrini öz adına çıxarması nə dərəcədə düzgündür? Hamı bilir ki, bugünkü əsas yığmanın əsası AFFA-nın əvvəlki rəhbərliyinin dövründə qoyulub. Hazırkı AFFA-nın “əsəri” isə məhz U-19-dur. Hansı ki, Avropada ən zəif göstəriciyə imza atıb. Bu nəticədə isə irəliləyişin heç i-si də yoxdur...

İBRAHİM