Tiaqo Silva: “Neftçi”yə qarşı ağlımızla deyil, ürəyimizlə oynayırdıq”

“Neftçi”yə qarşı oyunumuz çətin alındı. Final kimi görüş idi. Hər iki komanda avrokuboklara vəsiqə qazanmaq istəyir. Şadam ki, son dəqiqədə qol vura bildik və heç-heçə oynadıq. Çünki bu, çox vacib xal idi”.

Futbolxeber.az saytına açıqlamasında bu sözləri “Zirə”nin qapıçısı Tiaqo Silva Azərbaycan Premyer Liqasının 28-ci turunda “Neftçi”yə qarşı keçirdikləri oyun (1:1) barədə danışarkən deyib.

Portuqaliyalı matçın sonlarında Vensan Abubakardan topu aldığı epizodu da şərh edib: “Düzünü desəm, sonda ağlımızla deyil, ürəyimizlə oynayırdıq. Vensan Abubakarla mübarizə? Allaha şükür ki, topu ondan iki dəfə ala bildim. Daha çox xoşbəxtəm, çünki bundan sonra qol vura bildik və bu oyunda heç-heçə edə bildik. Artıq bu görüş geridə qaldı və biz kubokun yarımfinal matçı haqda düşünürük”.

26 yaşlı qolkiper ölkə kubokunu qazanmaq istədiklərini vurğulayıb: “Finala vəsiqə qazanmağı çox istəyirik. Kubok götürməyin vaxtıdır. Azarkeşlərimiz də, biz də buna layiqik. Burada olduğum son 3 ildə Azərbaycanın ən yaxşı komandalarından biri olmaq üçün çox mübarizə aparmışıq. Bəli, biz kuboku qazanmaq istəyirik”.