“Neftçi” böyük sıçrayış edib, halbuki qışda hamı mövsümün boşa getdiyini deyirdi”

“Neftçi” böyük sıçrayış edib. Halbuki qış fasiləsinə qədər hamı mövsümün boşa getdiyini deyirdi. Komanda yuxarı pillələrdən uzaq düşmüşdü. İndi isə “Neftçi” avrokubokların qapısını döyür”.

Futbolxeber.az saytına müsahibəsində bu sözləri milli komandamızın sabiq baş məşqçisi Şahin Diniyev deyib.

“Neftçi”nin cari mövsümdəki çıxışını dəyərləndirən mütəxəssis “ağ-qaralar” üçün qarşıdakı Zirə səfərinin çox mühüm əhəmiyyət kəsb etdiyini bildirib:

“Qarşıdakı “Zirə” - “Neftçi” matçı hər iki tərəf üçün çox vacibdir. 6 xallıq oyundur. “Neftçi” son turlar yuxarı pillələrə yaxınlaşıb. Düzdür, mövsümün sonuna elə də çox qalmayıb, ona görə də üçüncü yerə qədər irəliləyə biləcəklərinə inanmıram. Amma avrokuboklar şansı kifayət qədər realdır. Bu baxımdan “Zirə” və “Qarabağ”la oyunlar həm çətin keçəcək, həm də mühüm əhəmiyyət daşıyır. Zirədəki matçda hansı komanda gəlsə, bir addım irəlidə olacaq”.