“Turan Tovuz”un kapitanı: “Berdıyevin öz duruşu var, ondan çox şey öyrənirik”

“Sumqayıt”la oyunun “Turan Tovuz”un heyətində Premyer Liqada 100-cü matçım olduğunu bilirdim. Lakin bunun anons ediləcəyindən xəbərsiz idim. Mənim üçün də xoş oldu. İnşallah, davamlı olar, komandada daha çox oyun keçirərəm”.

Futbolxeber.az saytının məlumatına görə, bu sözləri "Turan Tovuz"un kapitanı Faiq Hacıyev deyib.

O, Tovuz klubunda uzun müddətdir çıxış etdiyini və burada xoşbəxt olduğunu bildirib: “Tovuzdan deyiləm. Artıq 5 ildir buradayam. “Turan Tovuz” mənə çox doğmadır. Tovuzda yaşadığım vaxtlar da olub. İnsanlar hər yerdə məni isti qarşılayırlar. İnsan belə münasibət gördüyü yerdən niyə getsin ki?”

26 yaşlı futbolçu komandanın baş məşqçisi Kurban Berdıyev haqqında müsbət fikirlər səsləndirib: “O, çox təcrübəli mütəxəssisdir. Berdıyevin öz duruşu var. Ondan çox şey öyrənirik. Baş məşqçimiz həm də bizə təcrübə qazandırır. Nə vaxtsa gələcəkdə məşqçi kimi çalışsaq, ondan öyrəndiklərimiz bizə çox faydalı olacaq”.

Hacıyev kubokdan əllərini üzmədiklərini vurğulayıb:

“Bəli, yarımfinalın ilk matçında “Zirə”yə 0:2 hesabı ilə uduzduq. Lakin bu, futboldur, hər birimiz vəziyyəti dəyişəcəyimizə inanırıq. Düzdür, hazırda fikrimiz “Araz-Naxçıvan”la çempionatdakı matça yönəlib. Həmin görüşdən sonra sırf “Zirə” ilə cavab matçına hazırlaşacağıq. Hər şey mümkündür. Əlimizdən gələni edəcəyik ki, turu keçən tərəf olaq”.

O, finala çıxmaq şanslarının tükənmədiyini hesab edir: “Şansımız niyə yoxdur? Əlimizdən gələni edəcəyik. Axıra qədər vuruşacağıq. Məşqçimizin tapşırıqlarını meydanda yerinə yetirsək, istədiyimiz nəticəni qazanarıq. Özümüzə güvənirik, heç kimdən çəkinmirik”.

“Turan Tovuz”un kapitanı diqqətlərini yalnız öz oyunlarına yönəltdiklərini söyləyib: “Çempionatda üçüncü olmaq şansımız yüksəkdir. Üçüncü yeri tutub, kuboku da götürsək, əla olar. Keçən il dördüncü olduq, lakin avrokuboklardan kənarda qaldıq. Ona görə bu dəfə ehtiyatı əldən vermək istəmirik. Turnir cədvəlinə, rəqiblərin oyunlarına çox da fikir vermirik. Bütün diqqətimizi öz çıxışımıza yönəltmişik”.