Şahin Diniyev: “Qarabağ”ın çempionluq şansı 30 faizdir”

“Faizlə götürsək, 70-in 30-a “Sabah” çempionluğa daha yaxındır. Oyunların az qalması, “Sabah”ın yaxşı formada olması və xal itirmək ehtimalının elə də çox olmaması belə düşünməyə əsas verir”.

Futbolxeber.az saytına müsahibəsində bu sözləri Şahin Diniyev deyib.

Cari mövsümdə Premyer Liqada çempionluq mübarizəsini dəyərləndirən təcrübəli mütəxəssis Ağdam klubunun titulunu qorumasının çətin olduğunu bildirib:

“Riyazi hesablamalar imkan verdiyi qədər çempionluq mübarizəsi davam edəcək. Futbolda möcüzələr baş verir. Ona görə də hər şey mümkündür. Lakin real görünən odur ki, “Sabah” 1 addım öndədir və bu şansı əldən verməyəcək. “Qarabağ” üçün xal fərqini aradan qaldırmaq çox çətin olacaq. Çempionatın sonuna da az qalıb”.

Diniyev qeyd edib ki, hazırkı məqamda Ağdam klubunun gümüş medal qazanacağı daha real görünür:

“Qarbaağ” o qədər düşməyib ki, ikinci yeri də əldən versin. Görünən odur ki, Ağdam klubu ikinci, “Turan Tovuz” isə üçüncü yeri tutmağa daha yaxındır. Hazırda bu komandalar “Zirə” və “Neftçi”dən 2-3 addım öndədirlər. Ona görə də qeyri-adi hal baş verməsə, ilk üçlükdə ardıcılıq məhz “Sabah”, “Qarabağ”, “Turan Tovuz” olacaq”.