Elvin Cəfərquliyev: “Yığışmaq lazımdır, komanda olaraq bu vəziyyətdən çıxacağıq”

“Təəssüf ki, iki vacib xal itirdik. Halbuki qələbə qazanmağı çox istəyirdik”.

Futbolxeber.az saytına müsahibəsində bu sözləri “Qarabağ”ın müdafiəçisi Elvin Cəfərquliyev Azərbaycan Premyer Liqasının 27-ci turunda “Şamaxı”ya qarşı keçirdikləri oyun barədə danışarkən deyib.

O, qolsuz heç-heçəni belə şərh edib: “Çox çətin idi, “Şamaxı” sıx müdafiə olunurdu. Oyunun sonlarına yaxın bütün komanda ilə oturmuşdular arxaya. Bu da bizə çətinlik yaradırdı. Şansımızı gözləyirdik. Az da olsa, epizodlarımız oldu. Təəssüf ki, onları da dəyərləndirə bilmədik. İstəməzdik xal itirək”.

Təcrübəli müdafiəçi qazanılan xala görə “Şamaxı”nı təbrik edib: “Qələbə istəyinin bizə mane olduğunu düşünmürəm. Rəqibin oyun tərzini bilirdik. Görüşdən əvvəl də heyətlərinə baxanda hansı sistemdə oynayaclarını, bizə qarşı necə mübarizə aparacaqlarını bilirdik. Əsas müdafiəyə fikir verirdilər. Məqsədləri uduzmamaq idi. Buna da nail oldular. “Şamaxı”nı təbrik edirəm. Layiqli mübarizə apardılar”.

Cəfərquliyev həm çempionatda, həm də kubokda sona qədər mübarizə aparacaqlarını vurğulayıb: “Bəli, qarşıda bizi çox çətin oyunlar gözləyir. Lakin yığışmaq lazımdır. Hər iki cəbhədə sona qədər mübarizə aparacağıq. Komanda olaraq bu vəziyyətdən çıxacağıq. Xeyirlisi nədirsə, inşallah o da olacaq. Biz həm kubokda, həm də çempionatda uğur qazanmaq üçün əlimizdən gələni edəcəyik”.