Fazil Mustafa: “Qarabağ” çempionluğu “Kəpəz”ə uduzanda əldən verdi”

Millət vəkili Fazil Mustafanın Futbolxeber.az saytına müsahibəsi

- Azərbaycan Premyer Liqasının 27-ci turu çərçivəsində keçirilən “Şamaxı” - “Qarabağ” oyununu stadiondan canlı izlədiniz. Təəssüratlarınız necədir, qarşılaşmanı bəyəndiniz?

- Açığı, “Şamaxı” komandası çox xoşuma gəldi. Meydanda hər kəs öz vəzifəsini yerinə yetirirdi. “Qarabağ” arzuladığımız oyunu nümayiş etdirmədi. Daha güclü oynaya bilərdi. Hər halda oyunun alınmaması məsələsi də var. Bölgədə belə coşqu, belə həyəcan görmək çox xoş idi. Regionda futbola belə marağın olması ümidlərimi artırdı. Uşaqların tanınmış futbolçuların arxasınca qaçması, imza istəməsi və s. - bütün bunları azyaşlıları futbola bağlayan bir stimuldur. Qol olmasa da, qola bərabər həyəcan yaşandı.

- “Qarabağ” bu matçda çempionluq yolunda vacib iki xal itirdi...

- Bəli. Amma məncə, “Qarabağ” çempionluğu “Kəpəz”ə uduzanda əldən verdi. Şamaxıdakı matçda da “Qarabağ” çempionluğa layiq futbol nümayiş etdirmədi. Qapıya bir dənə də zərbə vurmadılar. Belədə qol vurmaq da çətin olur.

- Hansısa kluba xüsusi simpatiyanız var, yoxsa gözəl futbola azarkeşlik edirsiniz?

- Futbolda azarkeşlik məsələsi ilə qurtarmışam. Həmişə yaxşı oynayana dəyər vermək lazımdır. Yoxsa bir komandaya azarkeşlik edirsən, o da tez-tez uduzur və nəticədə xəstəliyə yoluxursan.

- Siz həm də mütəmadi olaraq Azərbaycan futbolu ilə bağlı Milli Məclisdə çıxışlar edirsiniz...

- Sonuncu çıxışım Türkiyədəki turnirlə bağlı oldu. Bildiyiniz kimi, Antalyada keçirilən parlamentlərarası beynəlxalq futbol turnirində Milli Məclisin deputatlarından ibarət komandası da iştirak etdi. Finalda Türkiyə yığmasına uduzduq və ikinci yer tutduq. Turnir çox maraqlı keçdi. Ümumiyyətlə, parlamentdəki çıxışlarımızda da çalışırıq ki, futbolun təbliğatını aparaq. Futbola dəstək olaq. Azərbaycan futbol kütləviləşsin və inkişaf etsin.

- Millət vəkili kimi ölkədə futbola cavabdeh olan qurumun – AFFA-nın fəaliyyətini necə qiymətləndirirsiniz?

- AFFA-nın fəaliyyəti daha güclü olmalıdır. Ümumiyyətlə, futbol ölkədə yaradılan mühitdir. Lənkəranda, Şamaxıda o mühiti yaratmasan, futbolçu yetişməyəcək. Mühit olanda futbolçu da mütləq yetişəcək. 100 nəfərdən 5-i çıxacaq. Sadəcə daha fədakarcasına işləmək olar. Həm də düşünürəm ki, futbol üçün bir qədər fanatizm lazımdır. Özünü, varlığını futbolun inkişafı üçün həsr edən adamları görə bilmirəm. Ölkə olaraq heç kimdən geri qalmırıq. Lakin ölkə xaricində demək olar ki, normal futbolçumuz yoxdur. Erməninin, gürcünün 50-60 futbolçusu oynayır. Bunun adı nədir? Bu xalqın qabiliyyəti yoxdur? Var, əlbəttə. Təşkilatçılıq doğru qurulanda mütləq futbolçu da yetişəcək.

- Görünən odur ki, Gürcüstan Avropa, Özbəkistan dünya çempionatına vəsiqə qazandığı halda, Azərbaycan millisi Sent Lüsiya üzərində qələbəyə sevinir...

- Bəli. Belə çıxır ki, biz özümüzü dəyərləndirə bilmirik. Qarşıya daha böyük hədəflər qoymalıyıq. Hədəf üçün də mühit yaratmalısan. Bir ölkədə 5-6 komanda öz meydanında oynaya bilmirsə, “İmişli” Qubada, “Kəpəz” Yevlaxda, “Araz-Naxçıvan” Bakıda çıxış edirsə, bu, futbol deyil. Futbol yerində oynanılmalıdır.

Fərəc Aslanov