İfeanyi Metyu: “Bu gərgin qrafikdə azarkeşlərin dəstəyinə çox ehtiyacımız var”

“Çox yaxşı oyun keçirdik. Meydanda əlimizdən gələni etdik. Komanda olaraq yaxşı mübarizə apardıq və lazımi nəticəni qazandıq. Yolumuza davam edirik”.

Futbolxeber.az saytına müsahibəsində bu sözləri “Neftçi”nin yarımmüdafiəçisi İfeanyi Metyu Azərbaycan Premyer Liqasının 26-cı turunda səfərdə “Sumqayıt”a 3:1 hesabı ilə qalib gəldikləri oyun barədə danışarkən deyib.

O, ikinci hissədə qapılarında qol görmələrinə belə münasibət bildirib: “İkinci hissəyə yaxşı başlamadıq. Bəzi məqamlarda konsentrasiyanı itirdik. Bu da qapımızda qol görməyimizlə nəticələndi. Yaxşı ki, tez toparlandıq. Qollar vurduq və istədiyimiz nəticəni əldə etdik”

Nigeriyalı yarımmüdafiəçi komandasının avrokuboklar şansını bu cür dəyərləndirib:  “Avrokuboklar şansımız davam edir. Hazırda dördüncü pillədən cəmi 3 xal geri qalırıq. Lakin bu barədə çox düşünməyə dəyməz. Fikrimizi qarşıdakı matçlara yönəltməliyik. Məqsədimiz hər matçda 3 xal qazanmaqdır. Buna nail olsaq, hədəfimizə çatacağıq”.

Metyu qarşıdakı 4 matça da toxunub: “Həqiqətən də çox çətin perioda daxil oluruq. Bizi qarşıda ağır 4 oyun gözləyir. İstər “Araz-Naxçıvan”, istər “Zirə”, istərsə də “Qarabağ” – hər biri güclü rəqiblərdir. Heyətlərində keyfiyyətli oyunçular var. Buna baxmayaraq, məqsədimiz dəyişmir. Bütün matçlarda maksimum nəticə qazanmaq istəyirik. Bunun üçün də çalışacağıq”.

29 yaşlı futbolçu sonda azarkeşlərin dəstəyinə ehtiyac duyduqlarını vurğulayıb: “Qarşıdakı gərgin oyunlarda azarkeşlərin dəstəyinə çox ehtiyacımız var. Fanatlarımız hər zaman bizimlədirlər. Onların dəstəyi komanda üçün çox vacibdir. Azarkeşlərimiz bilsinlər ki, biz hər oyunda onları sevindirmək üçün əlimizdən gələni edirik. Avrokuboklar uğrunda da sona qədər mübarizə aparacağıq”.